Ездра

Кога непријателите на Јуда и Венијамин слушнаа дека вратените заробеници Му градат храм на Господ, Израелевиот Бог,

дојдоа кај Зоровавел и кај водачите на татковските домови и им рекоа: „Да градиме и ние со вас, зашто и ние Го бараме вашиот Бог и Му принесуваме жртви уште од времето на асирискиот цар Есар-Адон, кој нѐ доведе овде.“

Но Зоровавел, Исус и другите водачи на Израелевите татковски домови им одговорија: „Не можете заедно со нас да Му градите дом на нашиот Бог. Ние самите ќе Му го изградиме на Господ, Израелевиот Бог, како што ни заповеда персискиот цар Кир.“

Тогаш народите од земјата почнаа да го обесхрабруваат Јудиниот народ и да го заплашуваат за да го спречат во градењето.

Најмуваа советници против нив за да ги осуетат нивните намери во сите денови на персискиот цар Кир, сѐ до царувањето на персискиот цар Дариј.

Во времето на царувањето на Ахасвер, во почетокот на неговото царување, напишаа обвинение против жителите на Јуда и Ерусалим.

Во деновите на Артаксеркс, Вислам, Митридат, Тавеил и другите нивни соработници му пишаа на персискиот цар Артаксеркс. Писмото беше напишано со арамејско писмо и на арамејски јазик.

Управителот Рехум и писарот Самса напишаа писмо против Ерусалим до царот Артаксеркс. Во него стоеше:

„Управителот Рехум, писарот Самса и другите нивни соработници – судиите, Афарсахците, Тарфалците, Персијците, Архевците, Вавилонците, Шушанците, Деавците и Еламците,

како и другите народи што големиот и славен Асенафар ги пресели и ги насели во градовите на Самарија и во останатите места од другата страна на Реката – и така натаму.“

Ова е преписот од писмото што му го испратија: „До царот Артаксеркс, од твоите слуги, луѓето од другата страна на Реката. Мир и така натаму.

Нека му биде познато на царот дека Евреите што дојдоа од тебе кај нас стигнаа во Ерусалим и го градат бунтовниот и зол град. Ги обновуваат ѕидовите и ги поправаат темелите.

Нека му биде познато на царот дека, ако овој град биде изграден и неговите ѕидови бидат обновени, тие нема да плаќаат данок, царина или патна давачка, и така ќе им нанесат загуба на царските приходи.

Бидејќи сме издржувани од царскиот двор и не е добро да гледаме како му се нанесува штета на царот, го испраќаме ова известување до царот,

за да се пребара во книгата на летописите на твоите татковци. Во неа ќе најдеш и ќе дознаеш дека овој град е бунтовен град, штетен за царевите и областите, и дека во него од старо време се кревале востанија. Затоа овој град бил разурнат.

Му соопштуваме на царот дека, ако овој град биде повторно изграден и неговите ѕидови бидат обновени, нема да имаш власт над земјите од другата страна на Реката.“

Царот им одговори на управителот Рехум, на писарот Самса и на другите нивни соработници што живееја во Самарија и во останатите места од другата страна на Реката: „Мир и така натаму.

Писмото што ни го испративте беше јасно прочитано пред мене.

По моја заповед беше направено истражување и беше утврдено дека овој град уште од старо време се бунтувал против царевите и дека во него имало побуни и востанија.

Над Ерусалим имало и моќни цареви што владееле со сите земји од другата страна на Реката, на кои им се плаќале данок, царина и патна давачка.

Затоа издајте наредба тие луѓе да престанат со работата и овој град да не се гради додека јас не издадам нова заповед.

Внимавајте да не бидете небрежни во ова, за штетата да не се зголеми на загуба на царот.“

Кога преписот од писмото на царот Артаксеркс беше прочитан пред Рехум, писарот Самса и нивните соработници, тие веднаш отидоа во Ерусалим кај Евреите и насилно ги запреа.

Така престана работата на Божјиот дом во Ерусалим и остана запрена до втората година од царувањето на персискиот цар Дариј.