Ездра

Тогаш царот Дариј издаде заповед и пребараа во архивите во Вавилон, каде што се чуваа ризниците.

Во тврдината Ахмета, во мидиската област, најдоа еден свиток во кој беше запишано следново:

„Во првата година на царот Кир, царот Кир го издаде овој указ за Божјиот дом во Ерусалим: Домот нека биде повторно изграден како место каде што се принесуваат жртви, а неговите темели нека бидат цврсто поставени. Неговата височина нека биде шеесет лакти и широчината шеесет лакти.

Нека има три реда големи камења и еден ред нови дрвени греди, а трошоците нека се плаќаат од царската ризница.

И златните и сребрените предмети од Божјиот дом, кои Навуходоносор ги зеде од храмот во Ерусалим и ги однесе во Вавилон, нека бидат вратени. Секој предмет нека се постави на своето место во храмот во Ерусалим и нека биде внесен во Божјиот дом.“

„Затоа, Татнај, управителу на областа од другата страна на Реката, Сетар-Вознај и вие, нивни соработници Афарсахци, оддалечете се оттаму.

Не попречувајте ја работата на овој Божји дом. Јудејскиот управител и јудејските старешини нека го изградат Божјиот дом на неговото место.

Покрај тоа, издавам заповед за она што треба да го направите за јудејските старешини при градењето на овој Божји дом: трошоците на овие луѓе нека им се плаќаат веднаш од царските приходи, од данокот на земјите од другата страна на Реката, за работата да не биде запрена.

Сѐ што ќе им биде потребно – јунци, овни и јагниња за жртвите паленици на небесниот Бог, како и пченица, сол, вино и масло – нека им се дава секој ден без пропуст, според барањето на свештениците во Ерусалим.

Така нека Му принесуваат благоугодни жртви на небесниот Бог и нека се молат за животот на царот и на неговите синови.

Издавам и заповед: ако некој ја измени оваа наредба, нека се извади греда од неговата куќа, нека биде крената и тој нека биде погубен на неа, а неговата куќа нека се претвори во куп урнатини.

Бог, Кој го постави Своето име таму, нека го уништи секој цар и народ што ќе крене рака да ја измени оваа заповед и да го разурне Божјиот дом во Ерусалим. Јас, Дариј, ја издадов оваа заповед; нека биде целосно и веднаш извршена.“

Тогаш Татнај, управителот на областа од другата страна на Реката, Сетар-Вознај и нивните соработници веднаш постапија според заповедта на царот Дариј.

Јудејските старешини градеа и напредуваа, охрабрени од пророкувањето на пророкот Агеј и Захарија, синот на Идо. Го изградија и го довршија домот според заповедта на Израелевиот Бог и според указите на персиските цареви Кир, Дариј и Артаксеркс.

Домот беше довршен на третиот ден од месецот Адар, во шестата година од царувањето на царот Дариј.

Израелевите синови, свештениците, левитите и другите што се вратија од заробеништвото со радост го прославија посветувањето на Божјиот дом.

За посветувањето на Божјиот дом принесоа сто јунци, двесте овни и четиристотини јагниња, а како жртва за грев за целиот Израел – дванаесет јарци, според бројот на Израелевите племиња.

Ги поставија свештениците во нивните редови и левитите во нивните служби за Божјата служба во Ерусалим, според она што е запишано во Мојсеевата книга.

Оние што се вратија од заробеништвото ја прославија Пасхата на четиринаесеттиот ден од првиот месец.

Свештениците и левитите заедно се очистија; сите беа чисти. Левитите ја заклаа пасхалната жртва за сите што се вратија од заробеништвото, за своите браќа свештеници и за себе.

Израелевите синови што се вратија од заробеништвото јадеа од Пасхата, како и сите што им се придружија, одвојувајќи се од нечистотијата на народите во земјата, за да Го бараат Господ, Израелевиот Бог.

Седум дена со радост го прославуваа Празникот на бесквасните лебови, зашто Господ ги исполни со радост и го сврте срцето на асирискиот цар кон нив, за да ги зајакне нивните раце во работата на домот на Бог, Израелевиот Бог.