Галатјаните

Ви велам, пак, додека наследникот е дете, со ништо не се разликува од робот, иако е господар на сѐ,

туку е под старатели и управители до времето определено од таткото.

Така и ние, додека бевме малолетни, им робувавме на основните начела на светот.

А кога се исполни времето, Бог Го испрати Својот Син, роден од жена, роден под Законот,

за да ги откупи оние што беа под Законот, за да го примиме посинувањето.

А бидејќи сте синови, Бог Го испрати во нашите срца Духот на Својот Син, Кој вика: „Ава, Татко!“

Затоа не си веќе роб, туку син, а ако си син, тогаш си и наследник преку Бог.

Но вие порано, не познавајќи Го Бог, им бевте робови на оние што по природа не се богови.

А сега, кога Го познавате Бог – или, подобро речено, кога Бог ве позна – како повторно се враќате кон слабите и бедни начела, на кои одново сакате да им робувате?

Внимавате на деновите, месеците, времињата и годините.

Се плашам дека можеби напразно сум се трудел за вас.

Ве молам, браќа, бидете како мене, зашто и јас сум како вас! Вие со ништо не ми згрешивте.

А знаете дека првиот пат ви го проповедав Евангелието поради телесна немоќ;

иако мојата телесна состојба беше искушение за вас, не ме презревте ниту ме отфрливте, туку ме примивте како Божји ангел, како да бев Христос Исус.

Каде е сега вашето тогашно блаженство? Зашто ви сведочам дека ако беше можно, ќе ги извадевте и своите очи и ќе ми ги дадевте мене.

Дали ви станав непријател затоа што ви ја зборувам вистината?

Тие се трудат да ве придобијат, но не со добра намера. Сакаат да ве одвојат, за вие да се приврзете кон нив.

Добро е секогаш да бидете ревносно барани за добро, а не само кога сум присутен кај вас.

Деца мои, повторно трпам породилни маки за вас додека Христос не се обликува во вас,

би сакал сега да сум кај вас и да ви се обратам со поинаков тон, зашто сум во недоумица за вас.

Кажете ми, вие кои сакате да бидете под законот, не го слушате ли законот?

Зашто е напишано дека Авраам имаше два сина, едниот од робинката, а другиот од слободната жена.

Но оној од робинката е роден по тело, а оној од слободната преку ветување.

Ова е речено сликовито: тие жени се двата завета; едниот од гората Синај, кој раѓа за ропство; тој е Агара,

а Агара е гората Синај во Арабија и одговара на сегашниот Ерусалим, кој робува со своите деца.

Но горниот Ерусалим е слободен, тој е нашата мајка,

зашто е напишано: „Радувај се, неплодна жено, ти која не си родила; воскликни радосно, ти, која не си почувствувала породилни маки; зашто повеќе деца има напуштената, отколку онаа што има маж.“

А вие, браќа, сте деца на ветувањето како Исак.

И како што во тоа време оној што беше роден по тело го прогонуваше оној што се роди по дух, така е и сега.

А што вели Писмото? „Истерај ја робинката и нејзиниот син, зашто синот на робинката нема да биде наследник со синот на слободната!“

Затоа, браќа, ние не сме деца на робинката, туку на слободната.