Исаија

Господи, Ти си мојот Бог! Ќе Те возвишувам и ќе го славам Твоето име, зашто направи чудесни дела; Твоите одлуки од древни времиња се верни и сигурни.

Зашто градот го претвори во куп камења, утврдениот град во урнатини; палатата на туѓинците повеќе не е град и никогаш повторно нема да биде изградена.

Затоа силен народ ќе Те прославува и градовите на суровите народи ќе имаат стравопочит пред Тебе.

Зашто Ти беше тврдина за сиромавиот, тврдина за бедниот во неговата неволја, засолниште од бура и сенка од жега. Здивот на насилниците беше како бура што удира во ѕид,

како жега во сува земја. Но Ти ја стивна вревата на туѓинците; како што жегата се намалува под сенката на облак, така замолкна песната на насилниците.

На оваа гора Господ над војските ќе им подготви на сите народи гозба со најдобра храна, гозба со зрело вино, со богата храна и добро пречистено вино.

На оваа гора Тој ќе ја отстрани покривката што ги покрива сите народи и превезот што е распространет над сите племиња.

Ќе ја проголта смртта засекогаш. Господ Бог ќе ја избрише секоја солза од сите лица и ќе го отстрани срамот на Својот народ од целата земја. Зашто Господ го кажа тоа.

Во тој ден ќе речат: „Ете, ова е нашиот Бог! На Него се надевавме и Тој нѐ спаси. Ова е Господ! На Него се надевавме; да се радуваме и да се веселиме во Неговото спасение!“

Зашто Господовата рака ќе почива на оваа гора, а Моав ќе биде изгазен на своето место како што се гази слама во ѓубриште.

Ќе ги рашири рацете среде него како пливач што ги раширува рацете за да плива, но Господ ќе ја понижи неговата гордост и покрај умешноста на неговите раце.

Твоите високи и утврдени ѕидови Тој ќе ги собори, ќе ги понижи и ќе ги фрли на земјата, до самата прав.