Исаија

Вака вели Господ: „Каде е разводното писмо на вашата мајка со кое Јас ја отпуштив? Или на кој од Моите доверители ве продадов? Ете, поради своите беззаконија бевте продадени и поради своите престапи вашата мајка беше отпуштена.

Зошто, кога дојдов, немаше никој? Кога повикав, никој не одговори? Зар Мојата рака стана прекратка за да откупи? Зар немам сила да избавам? Ете, со Својот укор го исушувам морето и ги претворам реките во пустина; нивните риби се усмрдуваат поради недостиг од вода и умираат од жед.

Ги облекувам небесата во темнина и вреќиштето им го правам покривка.“

Господ ми даде јазик на ученик, за да знам со збор да го поткрепам изморениот. Секое утро ме буди; ми го буди увото за да слушам како ученик.

Господ ми го отвори увото, а јас не се побунив и не се повлеков назад.

Го подадов својот грб на оние што ме удираа и образите на оние што ми ја кубеа брадата. Не го сокрив своето лице од навреди и плукање.

Но Господ ми помага; затоа нема да бидам посрамен. Затоа го направив своето лице цврсто како кремен и знам дека нема да се засрамам.

Близу е Оној што ме оправдува. Кој ќе се препира со мене? Да застанеме заедно! Кој има обвинение против мене? Нека ми пристапи!

Ете, Господ ми помага. Кој ќе ме осуди? Сите тие ќе изветвеат како облека; молец ќе ги изеде.

Кој меѓу вас има стравопочит кон Господ и го слуша гласот на Неговиот Слуга? Оној што оди во темнина и нема светлина нека се надева на Господовото име и нека се потпре на својот Бог.

Но вие што палите оган и се опкружувате со огнени искри, одете во пламенот на својот оган и меѓу искрите што самите ги запаливте. Од Мојата рака ќе ви дојде ова: ќе легнете во мака.