Јаков

Од каде се војните и расправиите меѓу вас? Не доаѓаат ли од вашите страсти што војуваат во вас?

Посакувате, а немате; убивате и завидувате, но не можете да го добиете она што го сакате, па се борите и војувате. Немате затоа што не барате.

Барате, но не добивате, зашто барате со лоша намера, за да го потрошите на своите страсти.

Прељубници, не знаете ли дека пријателството со светот е непријателство кон Бог? И така, кој сака да му биде пријател на светот, Му станува непријател на Бог.

Или мислите дека Писмото напразно вели: „Бог ревносно го посакува духот што го всели во нас“?

Но Тој дава поголема благодат. Затоа вели: „Бог им се противи на горделивите, а на понизните им дава благодат.“

Затоа покорете Му се на Бог, а спротивставете му се на ѓаволот и тој ќе побегне од вас.

Приближете се кон Бог, и Тој ќе се приближи кон вас. Исчистете ги рацете, грешници, и очистете ги срцата, вие кои сте двоумни!

Бидете нажалени, тагувајте и плачете; вашата смеа нека се претвори во тага, а радоста во жалост!

Понизете се пред Господ, и Тој ќе ве возвиши!

Не зборувајте зло еден за друг, браќа. Оној што зборува зло за својот брат или го суди својот брат, зборува зло за Законот и го суди Законот. А ако го судиш Законот, не си извршител на Законот, туку судија.

Има само еден Законодавец и Судија, Оној Кој може да спаси и да погуби. А кој си ти што го судиш ближниот?

Чујте сега вие, кои велите: „Денес или утре ќе отидеме во тој и тој град и таму ќе останеме една година, ќе тргуваме и ќе спечалиме“,

а не знаете што ќе биде утре. Што е вашиот живот? Вие сте како пареа што се појавува за кратко, а потоа исчезнува.

Наместо да велите: „Ако Господ сака, ќе живееме и ќе направиме ова или она“,

но сега се фалите со своите самоуверени планови. Секоја таква фалба е зла.

И така, кој знае да прави добро, а не го прави, прави грев.