Јов

Глава 5

1
„Повикај сега! Има ли некој што ќе ти одговори? Кон кого од светите ќе се свртиш?
2
Зашто гневот го убива безумниот, а зависта го погубува лековерниот.
3
Видов безумен како пушта корен, но одеднаш неговиот дом го видов под проклетство.
4
Неговите деца се далеку од спасение; ги газат кај градската порта и нема кој да ги избави.
5
Неговата жетва ја јаде гладниот и ја зема дури и од трњето, а замката му го голта богатството.
6
Зашто неволјата не излегува од правта, ниту маката никнува од земјата.
7
Но човекот се раѓа за мака, како што искрите летаат нагоре.
8
Јас, пак, би Го побарал Бог и својата работа би Му ја доверил Нему.
9
Тој прави големи и неистражливи дела, чудеса без број.
10
Тој дава дожд врз земјата и испраќа вода врз полињата.
11
Понижените ги издига високо, а ожалостените ги води кон спасение.
12
Тој ги руши замислите на лукавите, па нивните раце не можат да го извршат она што го намислиле.
13
Ги фаќа мудрите во нивната сопствена лукавост, а советот на итрите брзо пропаѓа.
14
Среде ден наидуваат на темнина и напладне пипаат како во ноќ.
15
Но Бог го спасува сиромавиот од мечот на нивната уста и од раката на силниот.
16
Така сиромавиот има надеж, а неправдата ја затвора својата уста.
17
Ете, блажен е човекот кого Бог го укорува; затоа не отфрлај ја поуката на Семоќниот.
18
Зашто Тој ранува, но и преврзува; Тој удира, но Неговите раце и исцелуваат.
19
Од шест неволји ќе те избави, а во седмата злото нема да те допре.
20
Во глад ќе те избави од смрт, а во војна од силата на мечот.
21
Ќе бидеш сокриен од камшикот на јазикот и нема да се плашиш кога ќе дојде пустош.
22
На пустошот и гладот ќе им се смееш и нема да се плашиш од земните ѕверови.
23
Зашто ќе имаш сојуз со камењата на полето, а полските ѕверови ќе живеат во мир со тебе.
24
Ќе знаеш дека во твојот шатор има мир; кога ќе го прегледаш својот дом, ништо нема да ти недостига.
25
Ќе знаеш дека твоето потомство ќе биде многубројно и твоите наследници како тревата на земјата.
26
Во длабока старост ќе слезеш во гробот, како сноп жито што се собира во свое време.
27
Ете, ова го испитавме и така е. Слушни го и прими го за себе.“