Јован

„Да не се вознемирува вашето срце. Верувајте во Бог, и во Мене верувајте.

Во домот на Мојот Татко има многу живеалишта. Ако не беше така, ќе ви кажев ли дека одам да ви подготвам место?

И кога ќе отидам и ќе ви подготвам место, повторно ќе дојдам и ќе ве земам кај Себе, за и вие да бидете каде што сум Јас.

А каде одам Јас, патот го знаете.“

Тома Му рече: „Господи, не знаеме каде одиш; и како можеме патот да го најдеме?“

Исус му рече: „Јас сум Патот, Вистината и Животот. Никој не доаѓа кај Таткото освен преку Мене.

Ако Ме познавате, ќе Го познаете и Мојот Татко. Отсега Го познавате и сте Го виделе.“

Филип Му рече: „Господи, покажи ни Го Таткото, и доста ни е!“

Исус му рече: „Толку време сум со вас, а не Ме позна, Филипе? Кој Ме видел Мене, Го видел Таткото. Како тогаш велиш: ‚Покажи ни Го Таткото‘?

Не веруваш ли дека Јас сум во Таткото и Таткото е во Мене? Зборовите што ви ги кажувам не ги зборувам Сам од Себе; туку Таткото, Кој останува во Мене, ги врши делата.

Верувајте Ми дека Јас сум во Таткото и Таткото е во Мене; а ако не, верувајте поради самите дела.

Вистина, вистина ви велам: кој верува во Мене, и тој ќе ги врши делата што Јас ги вршам, и поголеми од овие ќе врши, зашто Јас одам кај Таткото.

И што и да побарате во Мое име, тоа ќе го направам, за да се прослави Таткото во Синот.

Ако побарате нешто од Мене во Мое име, Јас ќе го направам.

Ако Ме љубите, ќе ги пазите Моите заповеди.

Јас ќе Го помолам Таткото, и Тој ќе ви даде друг Утешител, за да биде со вас довека,

Духот на вистината, Кого светот не може да Го прими, зашто не Го гледа ниту Го познава; а вие Го познавате, зашто останува со вас и ќе биде во вас.

Нема да ве оставам сираци; ќе дојдам кај вас.

Уште малку и светот веќе нема да Ме гледа; а вие ќе Ме гледате, зашто Јас живеам и вие ќе живеете.

Во оној ден ќе знаете дека Јас сум во Мојот Татко, вие во Мене и Јас во вас.

Кој ги има Моите заповеди и ги пази, тој Ме љуби; а кој Ме љуби, Мојот Татко ќе го љуби; и Јас ќе го љубам и ќе му се објавам.“

Јуда, не Искариот, Му рече: „Господи, зошто ќе ни се објавиш нам, а не на светот?“

Исус му одговори: „Ако некој Ме љуби, ќе го пази Мојот збор; и Мојот Татко ќе го љуби, и ќе дојдеме кај него и ќе направиме Свој дом кај него.

Кој не Ме љуби, не ги пази Моите зборови; а зборот што го слушате не е Мој, туку на Таткото Кој Ме испрати.

Ова ви го кажав додека сум со вас.

А Утешителот, Светиот Дух, Кого Таткото ќе Го испрати во Мое име, Тој ќе ве научи на сѐ и ќе ве потсети на сѐ што ви реков.

Мир ви оставам; Мојот мир ви го давам. Не ви го давам како што го дава светот. Нека не се вознемирува вашето срце и нека не се плаши.

Чувте дека ви реков: ‚Си одам и повторно ќе дојдам кај вас.‘ Ако Ме љубевте, ќе се радувавте што одам кај Таткото, зашто Таткото е поголем од Мене.

И сега ви кажав пред да се случи, та кога ќе се случи да поверувате.

Нема веќе многу да зборувам со вас, зашто доаѓа владетелот на овој свет, и во Мене тој нема ништо.

Но светот треба да знае дека Го љубам Таткото и дека правам како што Ми заповеда Таткото. Станете, да си одиме оттука!“