Јован

„Јас сум вистинската Лоза, а Мојот Татко е Лозарот.

Секоја гранка во Мене што не донесува плод Тој ја отстранува; а секоја што донесува плод ја очистува, за да донесува уште повеќе плод.

Вие сте веќе чисти поради зборот што ви го кажав.

Останете во Мене, и Јас во вас. Како што гранката не може да донесува плод сама од себе ако не остане на лозата, така ни вие ако не останете во Мене.

Јас сум Лозата, а вие сте гранките. Кој останува во Мене и Јас во него, тој донесува многу плод; зашто без Мене не можете да направите ништо.

Ако некој не остане во Мене, се исфрла надвор како гранка и се суши; таквите гранки ги собираат и ги фрлаат во оган и тие горат.

Ако останете во Мене и Моите зборови останат во вас, побарајте што сакате и ќе ви се исполни.

Со тоа се прославува Мојот Татко: да донесувате многу плод и да бидете Мои ученици.

Како што Таткото Ме засака, така и Јас ве засакав. Останете во Мојата љубов.

Ако ги пазите Моите заповеди, ќе останете во Мојата љубов, како што Јас ги пазев заповедите на Мојот Татко и останувам во Неговата љубов.

Ова ви го реков, за Мојата радост да биде во вас, и вашата радост да биде полна.

Ова е Мојата заповед: да се љубите еден со друг, како што Јас ве засакав.

Никој нема поголема љубов од оваа – да го положи својот живот за своите пријатели.

Вие сте Мои пријатели, ако го правите она што ви го заповедам.

Веќе не ве нарекувам слуги, зашто слугата не знае што прави неговиот господар; туку ве нареков пријатели, зашто ви објавив сѐ што чув од Мојот Татко.

Не Ме избравте вие Мене, туку Јас ве избрав вас и ве поставив да одите и да донесувате плод, и вашиот плод да остане, за Таткото да ви даде сѐ што ќе побарате од Него во Мое име.

Ова ви го заповедам: да се љубите еден со друг.

Ако светот ве мрази, знајте дека светот уште пред вас Ме замрази.

Да бевте од светот, светот ќе го љубеше своето; но бидејќи не сте од светот, туку Јас ве избрав од светот, затоа светот ве мрази.

Сетете се на зборот што ви го реков: ‚Слугата не е поголем од својот господар.‘ Ако Мене Ме гонеа, и вас ќе ве гонат; ако го пазеа Мојот збор, ќе го пазат и вашиот.

Но, сето ова ќе ви го прават поради Моето име, зашто не Го знаат Оној Кој Ме пратил.

Да не бев дошол и да не им бев зборувал, немаше да имаат грев; но сега немаат изговор за својот грев.

Кој Ме мрази Мене, Го мрази и Мојот Татко.

Да не бев ги направил меѓу нив делата што никој друг не ги направил, немаше да имаат грев; но сега ги видоа, а сепак Ме замразија и Мене и Мојот Татко.

Но тоа се случи за да се исполни зборот напишан во нивниот Закон: ‚Ме замразија без причина.‘

А кога ќе дојде Утешителот, Кого Јас ќе ви Го испратам од Таткото – Духот на вистината, Кој излегува од Таткото – Тој ќе сведочи за Мене.

А и вие ќе сведочите, бидејќи од почетокот сте со Мене.“