Јован

На првиот ден од седмицата, Марија Магдалена дојде на гробот рано, уште додека беше темно, и виде дека каменот е тргнат од гробот.

Тогаш отрча кај Симон Петар и кај другиот ученик, кого Исус го љубеше, и им рече: „Го зеле Господ од гробот, и не знаеме каде Го положиле.“

Тогаш излезе Петар и другиот ученик, и појдоа кон гробот.

И двајцата трчаа заедно, но другиот ученик трчаше побргу од Петар и прв стигна до гробот.

Се наведна и ги виде платната како лежат, но не влезе.

По него стигна Симон Петар, влезе во гробот и ги виде платната како лежат,

а крпата што Му беше на главата не лежеше со платната, туку беше свиткана одделно на едно место.

Тогаш влезе и другиот ученик, кој прв дојде до гробот, и виде и поверува.

Зашто уште не го знаеја Писмото дека Тој треба да воскресне од мртвите.

Потоа учениците повторно се вратија дома.

А Марија стоеше надвор кај гробот и плачеше. Додека плачеше, се наведна кон гробот

и виде два ангела во бела облека како седат, едниот кај главата, а другиот кај нозете, каде што лежеше Исусовото тело.

Тие ѝ рекоа: „Жено, зошто плачеш?“ Таа им рече: „Го зеле мојот Господ, и не знам каде Го положиле.“

Штом го рече ова, се сврте и Го виде Исус како стои; но не знаеше дека е Исус.

Исус ѝ рече: „Жено, зошто плачеш? Кого бараш?“ Таа, мислејќи дека е градинарот, Му рече: „Господине, ако Ти си Го однел, кажи ми каде си Го положил, и јас ќе Го земам.“

Исус ѝ рече: „Марија!“ Таа се сврте и Му рече на еврејски: „Равуни“, што значи: „Учителе!“

Исус ѝ рече: „Не задржувај Ме, зашто уште не сум се вознел кај Таткото; туку оди кај Моите браќа и кажи им: ‚Се вознесувам кај Мојот Татко и вашиот Татко, кај Мојот Бог и вашиот Бог.‘“

Марија Магдалена дојде и им објави на учениците дека Го видела Господ и дека Тој ѝ го кажал тоа.

Вечерта во истиот ден, првиот ден од седмицата, вратите на просторијата во која беа собрани учениците беа заклучени поради страв од Јудејците. Исус дојде, застана меѓу нив и им рече: „Мир вам!“

Кога го рече тоа, им ги покажа Своите раце и Својата страна. Учениците се израдуваа кога Го видоа Господ.

А Исус пак им рече: „Мир вам! Како што Ме прати Таткото, така и Јас ве праќам.“

Кога го рече тоа, дувна врз нив и им рече: „Примете Го Светиот Дух.

На кои ќе им ги простите гревовите, простени им се; на кои ќе им ги задржите, задржани им се.“

А Тома, еден од дванаесетте, наречен Близнак, не беше со нив кога дојде Исус.

Другите ученици му рекоа: „Го видовме Господ!“ А тој им рече: „Ако не ги видам трагите од клинците на Неговите раце, ако не го ставам својот прст во трагите од клинците и не ја ставам својата рака во Неговата страна, нема да поверувам.“

Осум дена подоцна Неговите ученици повторно беа внатре, и Тома со нив. Исус дојде, иако вратите беа заклучени, застана меѓу нив и рече: „Мир вам!“

Потоа му рече на Тома: „Стави го својот прст овде и види ги Моите раце; подај ја својата рака и стави ја во Мојата страна; и не биди неверен, туку верен.“

Тома Му одговори: „Мој Господ и мој Бог!“

Исус му рече: „Поверува затоа што Ме виде?“ Блажени се оние што не виделе, а поверувале.

Исус направи и многу други знаци пред Своите ученици, кои не се запишани во оваа книга.

А овие се напишани за да верувате дека Исус е Христос, Божјиот Син, и преку верата да имате живот во Неговото име.