Судии

По Авимелех стана Тола, синот на Фуа, син на Додо, човек од Исахаровото племе, за да го избави Израел. Живееше во Самир, во Ефремовата планинска земја.

Му судеше на Израел дваесет и три години. Потоа умре и беше погребан во Самир.

По него стана Јаир Галадецот и му судеше на Израел дваесет и две години.

Тој имаше триесет синови што јаваа на триесет магариња и имаа триесет градови; тие и до денес се викаат Јаирови Села и се наоѓаат во Галаадската земја.

Потоа Јаир умре и беше погребан во Камон.

Израелевите синови повторно правеа зло пред Господ: им служеа на Ваалите, Астартите, боговите на Арам, боговите на Сидон, боговите на Моав, боговите на Амонците и боговите на Филистејците. Го оставија Господ и не Му служеа.

Тогаш Господовиот гнев пламна против Израел, и Тој ги предаде во рацете на Филистејците и во рацете на Амонците.

Од таа година тие ги кршеа и угнетуваа Израелевите синови осумнаесет години – сите Израелеви синови што беа од другата страна на Јордан, во земјата на Аморејците, во Галаад.

Амонците го преминаа Јордан за да војуваат и против Јуда, Венијамин и Ефремовиот дом; така Израел беше во голема неволја.

Тогаш Израелевите синови повикаа кон Господ: „Згрешивме против Тебе, зашто Го оставивме својот Бог и им служевме на Ваалите“.

Господ им рече на Израелевите синови: „Зар не ве избавив од Египќаните, Аморејците, Амонците и Филистејците?

Кога ве угнетуваа Сидонците, Амаликијците и Маонците, вие повикавте кон Мене, и Јас ве избавив од нивните раце.

Но вие Ме оставивте и им служевте на други богови; затоа нема повеќе да ве избавувам.

Одете и повикајте кон боговите што ги избравте; нека ве избават во времето на вашата неволја“.

Израелевите синови Му рекоа на Господ: „Згрешивме. Направи ни според сѐ што е добро во Твоите очи, само избави нѐ денес, Те молиме“.

Тогаш ги отстранија туѓите богови од својата средина и Му служеа на Господ. И Неговата душа не можеше повеќе да го поднесува страдањето на Израел.

Амонците се собраа и се улогорија во Галаад; а Израелевите синови се собраа и се улогорија во Масфа.

Народот и галаадските владетели си рекоа еден на друг: „Кој човек ќе ја започне војната против Амонците? Тој ќе стане поглавар над сите жители на Галаад“.