3 Мојсеева — Левит

Ако нечиј принос е жртва за мир и ја принесува од говедата, било машко било женско животно, нека биде без недостаток пред Господ.

Нека ја положи својата рака врз главата на својот принос и нека го заколе пред влезот на Шаторот на средбата. А свештениците, Ароновите синови, нека го попрскаат жртвеникот од сите страни со крвта.

Од жртвата за мир нека Му го принесе на Господ како жртва со оган: маснотијата што ги покрива внатрешните органи и сета маснотија што е околу нив,

двата бубрега со маснотијата околу нив, кај слабините, и обвивката на црниот дроб, која нека ја отстрани заедно со бубрезите.

Ароновите синови нека го изгорат сето тоа на жртвеникот, врз жртвата паленица што е над дрвата на огнот. Тоа е жртва принесена со оган, со пријатен мирис за Господ.

Ако неговиот принос за жртва за мир на Господ е од стадото, било машко било женско животно, нека биде без недостаток.

Ако принесува јагне, нека го доведе пред Господ.

Нека ја положи својата рака врз главата на својот принос и нека го заколе пред Шаторот на средбата. А Ароновите синови нека го попрскаат жртвеникот од сите страни со неговата крв.

Од жртвата за мир нека Му го принесе на Господ како жртва со оган: нејзината маснотија, целата масна опашка, отстранета при самиот рбет, маснотијата што ги покрива внатрешните органи и сета маснотија што е околу нив,

двата бубрега со маснотијата околу нив, кај слабините, и обвивката на црниот дроб, која нека ја отстрани заедно со бубрезите.

Свештеникот нека го изгори сето тоа на жртвеникот. Тоа е храна, жртва принесена со оган на Господ.

Ако неговиот принос е коза, нека ја доведе пред Господ.

Нека ја положи својата рака врз нејзината глава и нека ја заколе пред Шаторот на средбата. А Ароновите синови нека го попрскаат жртвеникот од сите страни со нејзината крв.

Од неа нека Му го принесе на Господ како жртва со оган: маснотијата што ги покрива внатрешните органи и сета маснотија што е околу нив,

двата бубрега со маснотијата околу нив, кај слабините, и обвивката на црниот дроб, која нека ја отстрани заедно со бубрезите.

Свештеникот нека го изгори сето тоа на жртвеникот. Тоа е храна, жртва принесена со оган, со пријатен мирис. Сета маснотија Му припаѓа на Господ.

Ова нека биде вечна одредба за сите ваши поколенија, во сите ваши живеалишта: не јадете ниту маснотија ниту крв.