Лука

Исус, исполнет со Светиот Дух, се врати од Јордан, а Духот Го водеше во пустината.

Четириесет дена беше искушуван од ѓаволот. Во тие денови ништо не јадеше, а кога тие завршија, огладне.

И Му рече ѓаволот: „Ако си Божји Син, кажи му на овој камен да стане леб.“

Исус му одговори: „Напишано е: ‚Човекот нема да живее само од леб.‘“

И кога Го одведе нагоре, ѓаволот Му ги покажа во еден миг сите царства на светот.

И Му рече ѓаволот: „Тебе ќе Ти ја дадам сета оваа власт, и нивната слава, зашто мене ми е предадена, и ја давам кому сакам.

Затоа, ако ми се поклониш, сето тоа ќе биде Твое.“

Исус му одговори: „Напишано е: ‚На Господ, твојот Бог, поклонувај Му се и служи само Нему!‘“

Потоа ѓаволот Го одведе во Ерусалим, Го постави на врвот од храмот и Му рече: „Ако си Божји Син, фрли се оттука долу,

зашто е напишано: ‚На Своите ангели ќе им заповеда за Тебе да Те чуваат,

и тие ќе Те носат на раце, за да не ја удриш Својата нога во камен.‘“

Исус му одговори: „Речено е: ‚Не искушувај Го Господ, твојот Бог.‘“

Кога ги заврши сите искушенија, ѓаволот се оддалечи од Него до погодно време.

Исус се врати во Галилеја во силата на Духот; и се разнесе глас за Него по целиот тој крај.

А Тој поучуваше по нивните синагоги, прославуван од сите.

И дојде во Назарет, каде што беше одраснал, и по Својот обичај влезе еден саботен ден во синагогата, па застана да чита.

Му ја подадоа книгата на пророкот Исаија; и Тој, штом ја отвори, го најде местото каде што беше напишано:

„Господовиот Дух е врз Мене, зашто Ме помаза да им го објавам Евангелието на сиромашните. Ме испрати да им објавам ослободување на заробените и прогледување на слепите, да ги ослободам угнетените

и да ја објавам годината на Господовата милост.“

И кога ја затвори книгата и му ја даде на слугата, седна; а очите на сите во синагогата беа вперени во Него.

Почна да им зборува: „Денес се исполни ова Писмо што го слушнавте.“

Сите зборуваа добро за Него и се восхитуваа на благодатните зборови што излегуваа од Неговата уста. Велеа: „Не е ли Овој синот на Јосиф?“

Тој им рече: „Сигурно ќе Ми ја кажете поговорката: ‚Лекаре, излекувај се самиот! Направи го и овде, во Својот роден крај, она што чувме дека се случило во Капернаум.‘“

Потоа рече: „Вистина ви велам: ниеден пророк не е прифатен во својот роден крај.

Навистина ви кажувам: имаше вдовици во Израел, во деновите на Илија, кога се затвори небото три години и шест месеци и настана голем глад во целата земја;

и при ниедна од нив не беше испратен Илија, но само кај вдовицата во Сарепта Сидонска;

Многумина во Израел беа болни од лепра во времето на пророкот Елисеј, но ниеден од нив не беше очистен, освен Сириецот Нееман.“

А кога го чуја тоа, сите во синагогата се исполнија со гнев;

Тие станаа, Го изведоа надвор од градот и Го одведоа до работ на ридот на кој беше изграден нивниот град, со намера да Го турнат надолу.

Но Тој си помина меѓу нив и си отиде.

И слезе во Капернаум, во галилејскиот град, и ги поучуваше во саботните денови.

Се восхитуваа на Неговото учење, зашто Неговиот Збор беше со власт.

Во синагогата имаше човек опседнат од нечист демонски дух. Тој извика со силен глас:

„Остави нѐ! Што имаш Ти со нас, Исусе Назареецу? Дојде ли да нѐ погубиш? Знам Кој си — Светиот Божји!“

Исус му заповеда: „Молкни и излези од него!“ Демонот го фрли човекот среде сите и излезе од него, без да му наштети.

Сите се зачудија и си велеа еден на друг: „Каков е овој Збор? Со власт и сила им заповеда на нечистите духови, и тие излегуваат!“

Па се разнесе глас за Него по сите околни места.

Откако излезе од синагогата, Исус влезе во домот на Симон. Симоновата тешта имаше силна треска, па Го замолија да ѝ помогне.

Исус застана над неа, ја укори треската и таа ја остави. Жената веднаш стана и им служеше.

На зајдисонце, сите што имаа болни од разни болести ги доведуваа кај Него. Тој полагаше раце врз секого од нив и ги исцелуваше.

Од мнозина излегуваа и демони, викајќи: „Ти си Божјиот Син!“ Но Тој ги укоруваше и не им дозволуваше да зборуваат, зашто знаеја дека Тој е Христос.

Кога се раздени, Исус излезе и отиде на осамено место. Луѓето Го бараа, а кога дојдоа кај Него, се обидуваа да Го задржат за да не си оди од нив.

Но Тој им рече: „И во другите градови треба да го објавам Евангелието за Божјото царство, зашто за тоа сум испратен.“

И проповедаше по синагогите во Јудеја.