Малахија

И така, оваа заповед е за вас, свештеници:

ако не послушате и не си ставите на срце, за да оддадете слава на Моето име, вели Господ над војските, Јас ќе испратам над вас проклетство и ќе ги проколнам вашите благослови, и веќе проколнувам, бидејќи вие не сакате ова да го примите на срце.

И ете, Јас ќе ви го одземам трудот, а нечистотијата од вашите празнични жртви ќе ви ја фрлам врз лицето, и ќе ве исфрлам заедно со нив.

И тогаш ќе познаете, дека Јас ја дадов таа заповед, за да го запазам Мојот завет со Левиј, вели Господ над војските.

Мојот Завет со него беше завет за живот и мир, и Јас му го дадов за да има страв; тој се боеше од Мене и од Моето име се плашеше.

Законот на вистината беше во неговата уста, и неправедност не се најде на неговиот јазик; во мир и правда тој одеше со Мене и многумина отстрани од грев.

Зашто устата на свештеникот треба да располага со знаење, и Законот го бараат од неговата уста, бидејќи тој е гласник на Господ над војските.

А вие се отстранивте од овој пат, на многумина им послуживте за сопнување во Законот, го разрурнавте заветот на Левиј, вели Господ над војските.

Затоа Јас ќе ве направам презрени и понизени пред сиот народ, зашто не ги запазивте Моите патишта и во Законот сте пристрасни.

Зар сите немаме еден Татко? Нели еден Бог нѐ создаде? Зошто тогаш ја изневеруваме довербата еден на друг, осквернувајќи го заветот на нашите татковци?

Јуда постапува неверно, и одвратност се врши во Израел и во Ерусалим, зашто Јуда ја оскверни Господовата светиња, која Тој ја сака, и се ожени со ќерка на туѓ бог.

Господ ќе го истреби од шаторите на Јаков секој што го прави тоа, и оној што принесува дар на Господ над војските.

А го правите и ова: го обливате со солзи Господовиот жртвеник, плачејќи и воздивнувајќи, така што Тој веќе не гледа на приносот и не го прима приносот со благонаклоност од вашите раце.

Вие, пак, велите - зошто? Поради тоа што Господ беше сведок меѓу тебе и жената од твојата младост, спрема која постапи неверно, иако таа е твоја сопатничка и жена со која си склучил завет.

Зар Бог не ги соедини во едно, иако духот Му припаѓа Нему? И зошто ги направи едно? За да има потомство што Му припаѓа на Бог. Затоа чувајте го својот дух и никој да не ја изневерува жената на својата младост.

Ако, пак, ја напуштиш од омраза, вели Господ Бог Израелев, бесчестие ќе си навлечеш на својата облека, така вели Господ над војските. Затоа пазете го својот дух да не постапувате неверно.

Вие го разгневувате Господ со своите зборови, велејќи: па со што го лутиме? Со тоа што велите - секој што прави зло, добар е пред очите на Господ и Нему Му е угоден, а и каде е Бог, Кој по правда суди?