Марко

Кога Исус излегуваше од храмот, еден од Неговите ученици Му рече: „Учителе, погледни какви камења и какви градби!“

Исус му одговори: „Ги гледаш ли овие големи градби? Нема да остане тука ни камен врз камен што нема да биде урнат.“

Кога седеше на Маслиновата Гора, спроти храмот, Петар, Јаков, Јован и Андреј Го прашаа насамо:

„Кажи ни, кога ќе се случи тоа и кој ќе биде знакот дека сето тоа наскоро ќе се исполни?“

Исус почна да им зборува: „Внимавајте никој да не ве измами.

Мнозина ќе дојдат во Мое име и ќе велат: „Јас сум“, и ќе измамат мнозина.

Кога ќе слушнете за војни и гласини за војни, не плашете се. Тоа треба да се случи, но тогаш сѐ уште не е крајот.

Ќе се крене народ против народ и царство против царство. На разни места ќе има земјотреси и глад. Тоа е почетокот на породилните болки.

Но вие внимавајте на себе. Ќе ве предаваат на судови, ќе ве тепаат во синагогите и ќе стоите пред управници и цареви поради Мене, за сведоштво пред нив.

А Евангелието најнапред треба да им биде проповедано на сите народи.

Кога ќе ве поведат и ќе ве предадат, не грижете се однапред што ќе зборувате; туку кажете го она што ќе ви биде дадено во тој час, зашто нема да зборувате вие, туку Светиот Дух.

Брат ќе предаде брат на смрт, а татко – своето дете. Децата ќе се кренат против родителите и ќе ги убиваат.

Сите ќе ве мразат поради Моето име; но кој ќе истрае до крај, ќе биде спасен.

Кога ќе ја видите „мерзоста на запустението“ како стои таму каде што не треба – кој чита, нека разбере – тогаш оние што се во Јудеја нека бегаат во планините.

Кој е на покривот нека не слегува во куќата, ниту нека влегува за да земе нешто од неа.

И кој е на нива нека не се враќа назад за да ја земе својата облека.

Тешко на бремените жени и на оние што дојат во тие денови!

Молете се вашето бегство да не биде во зима.

Зашто во тие денови ќе има таква неволја каква што немало од почетокот на светот што Бог го создаде, па сѐ до денес, ниту некогаш повторно ќе има.

И ако Господ не ги скратеше тие денови, ниеден човек немаше да се спаси; но поради избраните, кои Тој ги избра, ги скрати тие денови.

Тогаш, ако некој ви рече: ‚Еве, Христос е овде!‘ или: ‚Еве, таму е!‘, не верувајте.

Зашто ќе се појават лажни христоси и лажни пророци и ќе покажуваат знаци и чуда, за да ги измамат, ако е можно, и избраните.

Но вие внимавајте! Еве, однапред ви кажав сѐ.

Во тие денови, по таа неволја, сонцето ќе потемни, месечината нема да ја дава својата светлина,

ѕвездите ќе паѓаат од небото, а небесните сили ќе се разнишаат.

Тогаш ќе Го видат Човечкиот Син како доаѓа на облаците со голема сила и слава.

Тогаш Тој ќе ги испрати ангелите и ќе ги собере [Своите] избрани од четирите ветрови, од крајот на земјата до крајот на небото.

Од смоквата научете ја параболата: кога нејзините гранки ќе омекнат и ќе пуштат лисја, знаете дека летото е близу.

Така и вие, кога ќе видите дека сето тоа се случува, знајте дека Тој е близу, пред вратата.

Вистина ви велам: ова поколение нема да помине додека сето тоа не се случи.

Небото и земјата ќе поминат, но Моите зборови нема да поминат.

А за тој ден и час никој не знае – ниту ангелите на небото, ниту Синот, туку само Таткото.

Внимавајте, бдејте, зашто не знаете кога ќе дојде времето.

Тоа е како човек што заминал на пат и ја оставил својата куќа, им дал власт на своите слуги и на секого му ја определил неговата работа, а на вратарот му заповедал да бдее.

Затоа бдејте, зашто не знаете кога ќе дојде господарот на куќата: навечер, на полноќ, кога ќе запее петелот или наутро.

Да не дојде ненадејно и да ве најде заспани.

А она што ви го велам вам, им го велам на сите: бдејте!“