Марко

Рано наутро првосвештениците, заедно со старешините, учителите на Законот и целиот Врховен еврејски совет, се посоветуваа. Го врзаа Исус, Го одведоа и Го предадоа на Пилат.

Пилат Го праша: „Ти ли си Царот на Јудејците?“ Исус му одговори: „Ти велиш.“

Првосвештениците Го обвинуваа за многу работи.

Пилат повторно Го праша: „Ништо ли не одговараш? Погледни колку многу сведочат против Тебе!“

Но Исус повеќе ништо не одговори, така што Пилат се чудеше.

На секој празник Пилат им ослободуваше по еден затвореник, кого ќе го побараа.

Тогаш во затворот беше еден човек по име Варава, заедно со бунтовниците што извршиле убиство за време на бунтот.

Народот почна гласно да бара Пилат да постапи како што секогаш постапуваше.

Пилат им одговори: „Сакате ли да ви Го ослободам Царот на Јудејците?“

Зашто знаеше дека првосвештениците Го предале од завист.

Но првосвештениците го наговорија народот наместо Исус да им го ослободи Варава.

Пилат повторно им рече: „Што тогаш да направам со Царот на Јудејците?“

Тие повторно извикаа: „Распни Го!“

Пилат ги праша: „Какво зло направил?“ Но тие уште посилно викаа: „Распни Го!“

Пилат, сакајќи да му угоди на народот, им го ослободи Варава, а Исус Го предаде да биде распнат, откако нареди да Го камшикуваат.

Војниците Го одведоа во дворот на управителската палата, односно во преториумот, и ја собраа целата чета.

Го облекоа во пурпурна облека, сплетоа венец од трње и Му го ставија на главата.

Потоа почнаа да Го поздравуваат: „Радувај се, Цару на Јудејците!“

Го удираа по главата со трска, Го плукаа и, паѓајќи на колена, Му се поклонуваа.

Откако Му се изнасмеаја, ја соблекоа пурпурната облека, Му ја облекоа Неговата облека и Го изведоа да Го распнат.

Принудија еден минувач, Симон Киринеецот, таткото на Александар и Руф, кој доаѓаше од полето, да Му го носи крстот.

Го доведоа на местото Голгота, што значи „Место на черепот“.

Му дадоа вино измешано со смирна, но Тој не го прими.

Потоа Го распнаа и ја разделија Неговата облека, фрлајќи ждрепка за да видат кој што ќе земе.

Беше третиот час кога Го распнаа.

Над Него беше напишано обвинението: „Царот на Јудејците.“

Заедно со Него распнаа и двајца разбојници, едниот од Неговата десна страна, а другиот од Неговата лева.

[Во подоцнежни ракописи стои: „И се исполни Писмото што вели: ‚И беше вброен меѓу беззакониците.‘“]

Минувачите Го хулеа, нишајќи ги главите и велејќи: „Еј, Ти што го уриваш храмот и го изградуваш за три дена,

спаси се Себеси и слези од крстот!“

Исто така и првосвештениците со учителите на Законот Му се потсмеваа меѓу себе и велеа: „Други спасуваше, а Себеси не може да се спаси!

Христос, Израелевиот Цар, нека слезе сега од крстот, за да видиме и да поверуваме!“ Го навредуваа и оние што беа распнати со Него.

Кога дојде шестиот час, настана темнина по целата земја до деветтиот час.

Во деветтиот час Исус извика со силен глас: „Елои, Елои, лема савахтани?“ – што значи: „Боже Мој, Боже Мој, зошто Ме остави?“

Некои од оние што стоеја таму, кога го слушнаа тоа, рекоа: „Еве, го повикува Илија.“

Еден човек притрча, натопи сунѓер во кисело вино, го стави на трска и Му даде да пие, велејќи: „Оставете, да видиме дали ќе дојде Илија да Го симне.“

А Исус извика со силен глас и издивна.

Тогаш завесата во храмот се расцепи на две, одозгора до долу.

Кога стотникот што стоеше спроти Него виде дека така издивна, рече: „Навистина, Овој Човек беше Божји Син!“

Таму имаше и жени што гледаа оддалеку. Меѓу нив беа Марија Магдалена, Марија, мајката на Јаков Помладиот и на Јосес, и Саломија.

Тие Го следеа и Му служеа уште кога беше во Галилеја. Таму имаше и многу други жени што беа дошле со Него во Ерусалим.

Бидејќи веќе се стемнуваше, а беше ден на подготовка, односно ден пред саботата,

дојде Јосиф од Ариматеја, почитуван член на Советот, кој и самиот го очекуваше Божјото царство. Тој се осмели да влезе кај Пилат и го побара Исусовото тело.

Пилат се зачуди дека Исус веќе умрел. Го повика стотникот и го праша дали одамна умрел.

Кога дозна од стотникот, му го предаде телото на Јосиф.

Јосиф купи ленено платно, Го симна Исус, Го завитка во платното и Го положи во гроб издлабен во карпа. Потоа навали камен пред влезот на гробот.

А Марија Магдалена и Марија, мајката на Јосес, гледаа каде беше положен.