Марко

Глава 16

1
Кога помина саботата, Марија Магдалена, Марија, мајката на Јаков, и Саломија купија мириси за да отидат и да Го помазаат.
2
Многу рано, во првиот ден од седмицата, дојдоа кај гробот при изгрејсонце.
3
Си велеа една на друга: „Кој ќе ни го одвали каменот од влезот на гробот?“
4
Но кога погледнаа, видоа дека каменот е одвален, иако беше многу голем.
5
Кога влегоа во гробот, видоа млад човек облечен во бела облека како седи од десната страна, и се уплашија.
6
Но тој им рече: „Не плашете се! Го барате Исус Назареќанецот, Распнатиот. Тој воскресна; не е овде. Еве го местото каде што Го положија.
7
Но одете и кажете им на Неговите ученици и на Петар: ‚Тој оди пред вас во Галилеја. Таму ќе Го видите, како што ви рече.‘“
8
Тие излегоа и побегнаа од гробот, зашто ги обзеде трепет и запрепастеност; и никому ништо не кажаа, зашто се плашеа.
9
⟦А Исус, кога воскресна рано во првиот ден од седмицата, најнапред ѝ се јави на Марија Магдалена, од која беше истерал седум демони.
10
Таа отиде и им јави на оние што беа со Него, а тие тагуваа и плачеа.
11
Кога чуја дека е жив и дека таа Го видела, не поверуваа.
12
Потоа им се јави во друг облик на двајца од нив, додека одеа кон селскиот предел.
13
Тие се вратија и им кажаа на другите, но ни ним не им поверуваа.
14
Најпосле им се јави на единаесеттемина додека беа на трпеза и ги укори поради нивното неверие и тврдоста на нивните срца, зашто не им поверуваа на оние што Го виделе воскреснат.
15
Потоа им рече: „Одете по целиот свет и проповедајте го Евангелието на секое создание.
16
Кој ќе поверува и ќе се крсти, ќе биде спасен; а кој нема да поверува, ќе биде осуден.
17
А оние што ќе поверуваат ќе ги придружуваат овие знаци: во Мое име ќе изгонуваат демони, ќе зборуваат на нови јазици,
18
ќе фаќаат змии, и ако испијат нешто смртоносно, нема да им наштети; ќе полагаат раце врз болни, и тие ќе оздравуваат.“
19
Откако им зборуваше, Господ Исус се вознесе на небото и седна од десната страна на Бог.
20
А тие отидоа и проповедаа насекаде, а Господ дејствуваше заедно со нив и го потврдуваше зборот со знаците што следуваа.⟧