Матеј

Кога Исус се роди во Витлеем, во Јудеја, во времето на цар Ирод, во Ерусалим дојдоа мудреци од исток

и прашаа: „Каде е новородениот Јудејски Цар? Ја видовме Неговата ѕвезда на Исток и дојдовме да Му се поклониме.“

Штом го чу тоа, цар Ирод се вознемири, а со него и целиот Ерусалим.

Ги собра сите првосвештеници и учители на Законот и ги праша каде треба да се роди Христос.

Тие му одговорија: „Во Витлеем, во Јудеја, зашто вака е напишано преку пророкот:

‚И ти, Витлееме, во Јудината земја, никако не си најмал меѓу јудејските владетели, зашто од тебе ќе излезе Владетел Кој ќе го пасе Мојот народ Израел.‘“

Тогаш Ирод тајно ги повика мудреците и дозна од нив точно кога се појавила ѕвездата,

па, испраќајќи ги во Витлеем, рече: „Отидете и распрашајте се добро за Детето и, штом ќе Го најдете, јавете ми за да отидам и јас да Му се поклонам.“

Откако го ислушаа царот, тргнаа. Ѕвездата што ја видоа на Исток одеше пред нив, сѐ додека не застана над местото каде што беше Детето.

А кога ја видоа ѕвездата, тие се израдуваа со многу голема радост.

Влегоа во куќата, Го видоа Детето со Марија, Неговата мајка, паднаа ничкум и Му се поклонија. Потоа ги отворија своите ковчежиња и Му принесоа дарови: злато, темјан и смирна.

А бидејќи во сон беа предупредени да не се враќаат кај Ирод, си заминаа во својата земја по друг пат.

Откако мудреците си заминаа, Господов ангел му се јави на Јосиф во сон и му рече: „Стани, земи Го Детето и Неговата мајка и бегај во Египет. Остани таму додека не ти кажам, зашто Ирод ќе Го бара Детето за да Го убие.“

Јосиф стана уште истата ноќ, Го зеде Детето и Неговата мајка и замина во Египет.

Таму остана до Иродовата смрт, за да се исполни она што Господ го рече преку пророкот: „Од Египет Го повикав Својот Син.“

Кога Ирод виде дека мудреците го надмудриле, многу се разгневи. Нареди да бидат убиени сите машки деца во Витлеем и во целата околина, на возраст до две години, според времето што точно го дозна од мудреците.

Тогаш се исполни кажаното преку пророкот Еремија, кој вели:

„Глас се слушна во Рама, плач и голем лелек: Рахила ги оплакува своите деца и не сака да се утеши, зашто ги нема.“

По Иродовата смрт, Господов ангел му се јави на Јосиф во сон, додека беше во Египет,

и му рече: „Стани, земи Го Детето и Неговата мајка и оди во Израелевата земја, зашто умреа оние што сакаа да Го убијат Детето.“

Тој стана, Го зеде Детето и Неговата мајка и дојде во Израелевата земја.

Но кога чу дека во Јудеја владее Архелај наместо својот татко Ирод, се исплаши да оди таму. Откако беше предупреден во сон, замина во Галилејските предели.

Дојде и се насели во градот наречен Назарет, за да се исполни она што беше речено преку пророците: „Ќе биде наречен Назареец.“