Матеј

Во тие денови дојде Јован Крстител и проповедаше во Јудејската пустина,

и зборуваше: „Покајте се, зашто се приближи небесното царство!“

Тој е оној за кого зборуваше пророкот Исаија: „Глас на оној што вика во пустината: Подгответе го патот на Господ, исправете Му ги патеките.“

А сам Јован имаше облека од камилски влакна и појас од кожа околу половината, а храната му се состоеше од скакулци и див мед.

Тогаш кај него доаѓаа луѓе од Ерусалим, од цела Јудеја и од целиот крај околу Јордан,

и се крштаваа од него во реката Јордан, исповедувајќи ги своите гревови.

Кога виде дека многу фарисеи и садукеи доаѓаат на крштавањето, им рече: „Змиски породу! Кој ве предупреди да бегате од гневот што доаѓа?

Донесете плод достоен за покајание.

И не мислете дека можете да велите во себе: ‚Авраам ни е татко.‘ Ви велам: Бог може и од овие камења да подигне деца на Авраам.

Секирата веќе лежи кај коренот на дрвјата; затоа секое дрво што не дава добар плод се сече и се фрла во оган.

Јас ве крштавам со вода за покајание; но Оној што доаѓа по мене е посилен од мене, и јас не сум достоен да Му ги понесам сандалите. Тој ќе ве крсти со Светиот Дух и со оган.

Лопатата за веење е во Неговата рака. Тој целосно ќе го исчисти Своето гумно, ќе ја собере пченицата во житницата, а плевата ќе ја изгори со неизгаслив оган.“

Тогаш дојде Исус од Галилеја кај Јован, на реката Јордан, за да се крсти од него.

Но Јован Го одвраќаше и велеше: „Јас треба да бидам крстен од Тебе, а Ти доаѓаш кај мене?“

Исус му одговори: „Остави сега, зашто вака ни прилега да ја исполниме секоја праведност.“ Тогаш Јован Му дозволи.

И штом се крсти, Исус веднаш излезе од водата. Одеднаш Му се отворија небесата, и Го виде Божјиот Дух да слегува како гулаб и да се спушта над Него.

И од небото се слушна глас: „Овој е Мојот сакан Син, со Кого сум задоволен!“