Матеј

„Зашто небесното царство е слично на домаќин кој излезе рано наутро да најми работници за своето лозје.

Откако се договори со работниците за еден денариј на ден, ги испрати во своето лозје.

Потоа, кога излезе околу третиот час и виде други како стојат на пазариштето без работа,

им рече: ‚Одете и вие во моето лозје, па што е право, ќе ви дадам.‘ И тие отидоа.

Пак излезе околу шестиот и деветиот час и направи исто.

А околу единаесеттиот час одново излезе и најде други, како стојат без работа, и им рече: ‚Зошто стоите тука цел ден без работа?‘

Тие му одговорија: ‚Никој не нѐ најми.‘ А тој им рече: ‚Одете и вие во лозјето.‘

А кога се стемни, господарот на лозјето му рече на својот настојник: ‚Повикај ги работниците и плати им, почнувајќи од последните па до првите.‘

Кога дојдоа оние што беа најмени околу единаесеттиот час, секој доби по еден денариј.

Кога дојдоа првите, помислија дека ќе добијат повеќе, но и тие добија по еден денариј.

Кога ја добија платата, почнаа да негодуваат против господарот

и велеа: ‚Овие последните работеа само еден час, а ти ги изедначи со нас, кои го поднесовме тешкиот труд и жегата на целиот ден.‘

Но тој му одговори на еден од нив: „Пријателе, не те онеправдувам. Зар не се договори со мене за еден денариј?

Земи си го своето и оди си; и на овој, последниот сакам да му дадам колку и тебе;

зар немам право да правам со своето што сакам? Или ти е окото завидливо, зашто сум добар?‘

Така ќе бидат последните први, а првите последни.“

И кога се искачуваше Исус кон Ерусалим, ги зеде насамо дванаесетте ученици и по патот им рече:

„Ете, се искачуваме кон Ерусалим и Човечкиот Син ќе биде предаден на првосвештениците и учителите на Законот, и ќе Го осудат на смрт,

и ќе Го предадат на незнабожците да Му се потсмеваат, да Го бичуваат и да Го распнат; и на третиот ден ќе воскресне.“

Тогаш пристапи до Него мајката на Зеведеевите синови, заедно со своите синови и, клањајќи Му се, Го молеше нешто.

А Тој ѝ рече: „Што бараш?“ Таа Му одговори: „Заповедај овие мои два сина да седнат кај Тебе, едниот од десната страна, а другиот од левата страна во Твоето царство!“

Исус одговори: „Не знаете што барате. Можете ли да ја пиете чашата што Јас ќе ја пијам?“ Тие Му одговорија: „Можеме.“

Тој им рече: „Мојата чаша ќе ја пиете; но да седите од Мојата десна и од Мојата лева страна не е Мое да го дадам, туку тоа е за оние за кои е подготвено од Мојот Татко.“

И десетте, штом чуја, негодуваа против двајцата браќа.

Но Исус, кога ги повика, им рече: „Знаете дека владетелите господарат над народите, а управниците имаат власт над нив;

меѓу вас, пак, нека не биде така; а кој меѓу вас сака да биде поголем, нека ви биде слуга;

и кој сака меѓу вас да биде прв, нека ви биде роб;

Исто како што Човечкиот Син не дојде да Му служат, туку да служи и да го даде Својот живот како откупнина за мнозина.“

Кога излегуваа од Ерихон, по Него тргна многу народ.

И ете, двајца слепи, седнати покрај патот, штом чуја дека минува Исус, извикаа и велеа: „Смилувај ни се, Господи, Сине на Давид!“

А народот им заповеда да молчат; но тие уште посилно викаа и велеа: „Смилувај ни се, Господи, Сине на Давид!“

Исус застана, ги повика и рече: „Што сакате да ви направам?“

Тие Му одговорија: „Да ни се отворат очите.“

Исус се сожали над нив и им ги допре очите. Веднаш прогледаа и тргнаа по Него.