Матеј

По саботата, на разденување во првиот ден од седмицата, дојдоа Марија Магдалена и другата Марија да го видат гробот.

И ете, настана голем земјотрес; зашто Господов ангел слезе од небото, пристапи, го тргна каменот и седна на него.

Неговиот изглед беше како молња, а неговата облека бела како снег.

А стражарите, уплашени од него, трепереа и беа како мртви.

Ангелот се обрна кон жените и им рече: „Не плашете се; знам дека Го барате Исус распнатиот;

Не е овде; воскресна, како што рече. Дојдете и видете го местото каде што лежеше.

Одете брзо и кажете им на Неговите ученици дека воскресна од мртвите. И ете, Тој оди пред вас во Галилеја; таму ќе Го видите. Ете, ви кажав.“

Тие брзо излегоа од гробот и со страв и со голема радост отрчаа да им соопштат на Неговите ученици.

И ете, Исус ги пресретна и рече: „Радувајте се!“ А тие се приближија, ги опфатија Неговите нозе и Му се поклонија.

Тогаш Исус им рече: „Не плашете се. Одете и јавете им на Моите браќа да одат во Галилеја; таму ќе Ме видат.“

Додека тие одеа, ете, некои од стражарите, влегувајќи во градот, им кажаа на првосвештениците за сѐ што се случи.

И кога се собраа со старешините и се посоветуваа, им дадоа многу пари на војниците,

велејќи: „Кажете дека Неговите ученици дојдоа и Го украдоа, додека спиевме;

и ако за тоа чуе управникот, ние ќе го убедиме и ќе се погрижиме вие да немате грижа.“

Тие ги зедоа парите и направија како што беа поучени. И оваа гласина се рашири меѓу Јудејците сѐ до денес.

А единаесетте ученици отидоа во Галилеја, во гората, каде што им беше заповедал Исус;

па, штом Го видоа, Му се поклонија; а некои се сомневаа.

Исус им пристапи и рече: „Дадена Ми е сета власт на небото и на земјата.

Затоа одете и направете ги сите народи Мои ученици, крштавајќи ги во името на Таткото и Синот и Светиот Дух,

Учејќи ги да пазат сѐ што ви заповедав. И ете, Јас сум со вас секој ден, до крајот на овој век.