Матеј

„Внимавајте да не ја покажувате својата праведност пред луѓето за тие да ве видат; инаку нема да имате награда кај вашиот небесен Татко.

Затоа, кога им помагаш на сиромашните, не труби пред себе, како што прават лицемерите во синагогите и по улиците, за луѓето да ги фалат. Вистина ви велам: тие веќе ја добиле својата награда.

А кога им помагаш на сиромашните, твојата лева рака нека не знае што прави десната,

за твојата помош да остане тајна; а твојот Татко, Кој гледа во тајност, ќе те награди.

И кога се молите, не бидете како лицемерите, што сакаат да стојат по синагогите и раскрсниците за да се молат и да се покажат пред луѓето. Вистина ви велам: тие веќе ја добиле својата награда.

А ти, кога се молиш, влези во својата соба, затвори ја вратата и помоли Му се на својот Татко, Кој е во тајност; и твојот Татко, Кој гледа во тајност, ќе те награди.

А кога се молите, не повторувајте празни зборови како незнабожците, зашто тие мислат дека ќе бидат слушнати поради многуте зборови.

Не бидете како нив, зашто вашиот небесен Татко знае што ви е потребно уште пред да Го помолите.

Затоа молете се вака: ‚Татко наш, Кој си на небесата, да се свети Твоето име;

да дојде Твоето царство; да биде Твојата волја, како на небото, така и на земјата;

дај ни го денес нашиот потребен леб;

и прости ни ги нашите долгови, како што и ние им простивме на нашите должници;

и не воведувај нѐ во искушение, туку избави нѐ од лукавиот. [Во подоцнежни ракописи стои: „Зашто Твое е царството, силата и славата во сите векови. Амин.“]‘

Зашто ако вие им ги простите на луѓето нивните гревови, и вам ќе ви ги прости вашиот небесен Татко;

ако, пак, вие не им ги простите гревовите на луѓето, и вашиот Татко нема да ви ги прости вашите гревови.

Кога постите, не бидете како лицемерите; зашто тие си ги прават лицата мрачни, за да се покажат пред луѓето дека постат. Вистина ви велам, тие веќе ја добиле својата награда.

А ти, кога постиш, намачкај ја својата глава со масло и измиј го своето лице,

за да не покажуваш пред луѓето дека постиш, туку пред твојот Татко, Кој е во тајност; и твојот Татко, Кој гледа во тајност, ќе те награди.

Не собирајте богатства на земјата, каде што молецот и рѓата ги уништуваат, и каде што крадците провалуваат и крадат;

но собирајте си богатства на небото, каде што ниту молец ниту рѓа ги уништуваат, и каде што крадци не провалуваат ниту крадат;

зашто, каде што е вашето богатство, таму ќе биде и вашето срце.

Светлило за телото е окото. И така, ако твоето око биде чисто, и целото твое тело ќе биде светло;

Но ако твоето око е лошо, целото твое тело ќе биде во темнина. Ако светлината во тебе е темнина, колку голема е тогаш темнината!

Никој не може да им служи на двајца господари, зашто едниот ќе го мрази, а другиот ќе го сака; или кон едниот ќе биде приврзан, а другиот ќе го презира. Не можете да Му служите и на Бог и на богатството.

Затоа ви велам: не грижете се за својот живот – што ќе јадете или што ќе пиете, ниту за своето тело – во што ќе се облечете. Зар животот не е поважен од храната, а телото од облеката?

Погледајте ги птиците небесни; тие не сеат, ниту пак жнеат, ниту собираат во амбари; но вашиот Татко ги храни. Зар не сте поскапи од нив?

Кој од вас, грижејќи се, може да го продолжи својот живот макар за еден час?

Зошто се грижите и за облеката? Погледајте ги полските кринови како растат: не се трудат, ниту предат;

но ви велам дека ни Соломон, во сета своја слава, не беше облечен како еден од нив;

па, ако полската трева, што денес постои, а утре во оган се фрла, Бог така ја облекува, а колку повеќе вас, маловерни!

Па затоа не грижете се и не говорете: ‚Што ќе јадеме?‘, ‚Што ќе пиеме?‘ или ‚Во што ќе се облечеме?‘

Зашто сето тоа го бараат незнабожците, а вашиот небесен Татко знае дека од сето тоа имате потреба.

Но барајте го најнапред Божјото царство и Неговата праведност, и сето ова ќе ви се додаде.

И така, немојте да се грижите за утре, зашто утрешниот ден ќе се грижи за себе; на секој ден му е доволна неговата мака.“