Матеј

А кога слегна од планината, по Него одеше многу народ.

И ете, Му пристапи еден човек болен од лепра, Му се поклони и рече: „Господи, ако сакаш, можеш да ме очистиш.“

Исус ја испружи раката, го допре и рече: „Сакам. Очисти се!“ И веднаш се очисти од лепрата.

И му рече Исус: „Гледај, никому не кажувај; а оди, покажи му се на свештеникот и принеси го дарот што го заповедал Мојсеј, за сведоштво пред нив.“

А кога влезе Исус во Капернаум, Му пристапи еден стотник и Го молеше:

„Господи, мојот слуга лежи дома парализиран и многу страда.“

Исус му рече: „Ќе дојдам и ќе го излекувам.“

А стотникот одговори: „Господи, не сум достоен да влезеш под мојот покрив. Само кажи збор, и мојот слуга ќе оздрави.

Зашто и јас сум човек под власт, а имам и потчинети војници; па кога ќе му речам на еден од нив: ‚Оди!‘ и тој оди; и на другиот: ‚Дојди!‘ и тој доаѓа; и на слугата: ‚Направи тоа!‘ и тој прави.“

Кога го чу тоа, Исус се зачуди и им рече на оние што одеа по Него: „Вистина ви велам: ни во Израел не најдов толку голема вера.

И ви велам дека многумина ќе дојдат од исток и од запад и ќе седнат на трпеза со Авраам, Исак и Јаков во небесното царство,

а синовите на царството ќе бидат фрлени во надворешната темнина; таму ќе има плач и крцкање со заби.“

И му рече Исус на стотникот: „Оди си и, како што си верувал, нека ти биде!“ И неговиот слуга во истиот час оздраве.

Кога дојде во домот на Петар, Исус ја виде неговата тешта како лежи болна од треска,

И се допре до нејзината рака, и треската ја остави; таа стана и Му служеше.

Кога се стемни, Му доведоа многу луѓе опседнати од демони. Тој со збор ги изгони духовите и ги исцели сите болни,

за да се исполни она што беше кажано преку пророкот Исаија: „Тој ги зеде нашите немоќи и ги понесе нашите болести.“

Кога виде околу Себе многу народ, нареди да преминат на другата страна.

Тогаш Му пристапи еден учител на Законот и рече: „Учителе, ќе Те следам каде и да одиш.“

Исус му рече: „Лисиците имаат легла и небесните птици гнезда, а Човечкиот Син нема каде да ја положи Својата глава.“

Друг, пак, од учениците Му рече: „Господи, дозволи ми најнапред да отидам и да го погребам својот татко.“

Но Исус му рече: „Следи Ме, а остави ги мртвите да ги погребуваат своите мртви.“

И кога влезе во чамецот, по Него влегоа и Неговите ученици.

И ете, настана голема бура на морето, така што брановите го покриваа чамецот, а Тој спиеше.

Тогаш се приближија учениците до Него, Го разбудија и рекоа: „Господи, спаси нѐ! Загинуваме!“

А Тој им рече: „Зошто сте толку плашливи, маловерни?“ Потоа стана, им заповеда на ветровите и на морето, и настана голема тишина.

А луѓето се зачудија и рекоа: „Кој е Овој, па и ветровите и морето Му се покоруваат?“

Кога пристигна на другата страна, во гадаринскиот крај, Го сретнаа двајца опседнати од демони, кои излегуваа од гробиштата. Беа толку насилни што никој не можеше да помине по тој пат.

И ете, извикаа и рекоа: „Што имаш Ти со нас, Сине Божји? Зар си дошол тука предвреме да нѐ мачиш?“

А далеку од нив пасеа голем број свињи.

Демоните Го молеа: „Ако нѐ изгониш, дозволи ни да влеземе во свињите.“

И Тој им рече: „Отидете!“ И тие излегоа и отидоа во свињите. И одеднаш сите свињи се сурнаа низ стрмнината во морето.

А свињарите побегнаа и, штом дојдоа во градот, раскажаа за сето тоа и за она што се беше случило со опседнатите.

И ете, целиот град излезе да Го пресретне Исус; а кога Го видоа, Го замолија да си замине од нивниот крај.