Матеј

Тогаш Исус влезе во чамецот, премина на другата страна и дојде во Својот град.

И ете, Му донесоа еден парализиран човек, положен на постела. Кога ја виде нивната вера, Исус му рече на парализираниот: „Охрабри се, сине! Ти се простуваат гревовите.“

Тогаш некои од учителите на Законот рекоа во себе: „Овој богохулствува.“

А Исус, штом ги разбра нивните мисли, рече: „Зошто негувате зли мисли во своите срца?

Што е полесно да се каже: ‚Ти се простуваат гревовите‘, или: ‚Стани и оди‘?

Но да знаете дека Човечкиот Син има власт на земјата да простува гревови.“ Тогаш му рече на парализираниот: „Стани, земи ја постелата и оди си дома!“

И тој стана, ја зеде својата постела и си отиде дома.

А народот, кога го виде тоа, се исплаши и Го прослави Бог, Кој им даде таква власт на луѓето.

Кога заминуваше оттаму, Исус виде еден човек, по име Матеј, како седи на даночницата, и му рече: „Следи Ме!“ Тој стана и тргна по Него.

И додека Исус седеше на трпеза во куќата, одеднаш многумина даночници и грешници дојдоа и седнаа до Него и до Неговите ученици.

Но, штом го видоа тоа фарисеите, им рекоа на Неговите ученици: „Зошто вашиот Учител јаде со даночници и грешници?“

Кога го чу тоа, Исус им рече: „Не им треба лекар на здравите, туку на болните.

Одете и научете што значи: ‚Милост сакам, а не жртва.‘ Зашто не дојдов да ги повикам праведниците, туку грешниците.“

Тогаш дојдоа кај Него Јовановите ученици и рекоа: „Зошто ние и фарисеите постиме многу, а Твоите ученици не постат?“

А Исус им рече: „Зар можат свадбените гости да бидат нажалени додека со нив е младоженецот? Но ќе дојдат денови, кога младоженецот ќе им биде одземен, па тогаш ќе постат.

Никој не става крпа од ново платно на стара облека, зашто закрпата ќе се откине од облеката и расцепот ќе стане уште поголем.

Ниту се става ново вино во стари кожени мевови. Инаку мевовите ќе пукнат, виното ќе се истури, а мевовите ќе пропаднат. Новото вино се става во нови кожени мевови, и така и двете се зачувуваат.“

Додека Исус им го зборуваше тоа, Му пристапи еден старешина, Му се поклони и рече: „Ќерка ми штотуку умре; но дојди, положи ја Својата рака врз неа, и таа ќе оживее.“

Исус стана и тргна по него, а со Него и Неговите ученици.

И ете, една жена, која страдаше дванаесет години од крвавење, се приближи одзади и се допре до крајот на Неговата облека.

Зашто си велеше: „Само ако се допрам до Неговата облека, ќе оздравам.“

Исус се сврте, ја виде и рече: „Охрабри се, ќерко! Твојата вера те спаси.“ И жената оздраве во истиот час.

И кога дојде Исус во куќата на старешината и ги виде свирачите и вознемирениот народ,

им рече: „Излезете надвор, зашто девојката не е умрена, туку спие.“ А тие Му се потсмеваа.

Но штом го истера народот, Тој влезе, ја фати девојката за рака и таа стана.

И се расчу тоа по целиот крај.

А кога Исус си одеше оттаму, тргнаа по Него двајца слепи и викаа: „Смилувај ни се, Сине Давидов!“

А штом дојде во куќата, слепците се приближија до Него. И Исус им рече: „Верувате ли дека можам да го направам тоа?“ Тие Му рекоа: „Да, Господи!“

Тогаш ги допре нивните очи и рече: „Нека ви биде според вашата вера!“

И очите им се отворија; а Исус им заповеда строго: „Гледајте, никој да не дознае!“

А тие, штом излегоа, разнесоа вест за Него по целата таа земја.

Додека тие излегуваа, Му доведоа еден нем човек, опседнат од демон.

Откако демонот беше изгонет, немиот проговори. Народот се восхитуваше и велеше: „Никогаш не се видело вакво нешто во Израел!“

Но фарисеите велеа: „Тој ги изгонува демоните со помош на началникот на демоните.“

Исус одеше по сите градови и села, поучуваше во нивните синагоги, го проповедаше Евангелието за царството и лекуваше секаква болест и секаква немоќ.

Кога го виде мноштвото, се сожали над нив, зашто беа измачени и беспомошни, како овци без пастир.

Тогаш им рече на Своите ученици: „Жетвата е голема, а работници малку;

затоа помолете Го Господарот на жетвата да испрати работници на Својата жетва.“