Михеј

Тешко им на оние што кројат беззаконија и на своите легла измислуваат зли дела, и ги извршуваат штом ќе се зазори, зашто имаат моќ да ги извршат.

Ќе пожелат ниви - ги заземаат насила, куќи - ги отимаат; и го угнетуваат човекот, и неговата куќа, мажот и неговото наследство.

Затоа вака вели Господ: „Еве, Јас замислувам да испратам неволја против овој род, која не можете да ја отфрлите од својот врат, па затоа и нема да одите исправени; зашто тоа време ќе биде лошо.

Во она време ќе се зборува за вас, ќе плачат многу и ќе мислат: наполно сме разорени; делот од мојот народ е даден на друг; како да ми се врати? Нашите ниви се веќе разделени на другородци.“

Затоа нема да имате никого што ќе фрли жреб во собранието пред Господ.

Не проповедајте; не пророкувајте им за да не ве постигне зло.

О, ти, што се нарекуваш Јаковлев дом! Зар Господовиот Дух остана без трпение! Моите зборови зар не се благотворни за оној што постапува справедливо?

Но народот, кој некогаш беше Мој, сега стана непријател, и вие им ја грабите не само горната туку и долната облека на мирните луѓе, што се враќаат од војна.

Жените на Мојот народ ги истерувате од нивните пријатни домови; а од нивните деца ја одземате Мојата слава.

Станете и одете си, зашто ова не е земја за почивка; поради нечистотијата таа ќе биде разорена - и тоа со голема погибел.

Ако некој измамник измислува лага и вели: „Ќе ти проповедам за вино и за жесток пијалак“, тој би бил добар за пророк на овој народ.

Навистина ќе те соберам сиот, Јакове, навистина ќе го соберам Израелевиот остаток; ќе ги соберам во едно како овците во Восор, како стадо овци во кошара; ќе се разлева врева поради многубројноста.

Пред нив ќе тргне уривач на ѕидови; тие ќе ги разбијат преградите, ќе влезат низ портите и ќе излезат низ нив, и нивниот цар ќе тргне пред нив, и Господ - ќе биде на чело.