Михеј

Слушајте што вели Господ: „Стани, суди се пред горите, а ридовите нека го чујат твојот глас!

Чујте го Господовиот суд, гори, и вие, цврсти основи на земјата, зашто Господ му суди на Својот народ, се бори со Израелот.

Мојот народе, што ти направив и со што ти дотегнав? Одговори Ми.

Јас те изведов од Египетската земја, те ослободив од домот на ропството и ги водев пред тебе Мојсеј, Арон и Маријам.

Мојот народе, сети се што кроеше Валак, царот моавски, и што му одговори Валаам, синот на Веор и што стана од Ситим до Галгал - за да ги познаеш праведните дела на Господ.“

„Со што да застанам пред Господ, да се поклонам пред небесниот Бог? Да застанам ли пред Него со жртви паленици, со едногодишни телци?

Но може ли да Му се угоди на Господ со илјадници овни или неизмерни потоци масло? Дали да Му го дадам мојот првороден син за своите престапи и плодот на својата утроба - за гревовите на својата душа?“

О, човеку, речено ти е што е добро, и што бара од тебе Господ; да постапуваш праведно, да сакаш милосрдни дела и понизно да одиш пред твојот Бог.

Господовиот глас вика кон градот и мудриот се плаши од Твоето име; слушајте го стапот и Оној, Кој те поставил.

Па зар не се наоѓаат во домот на безбожникот неправедно богатство и мерка смалена, одвратна?

Можам ли да бидам чист со нечесни мерила и со лажни тегови во торбата?

Неговите богаташи се полни со неправедност, и неговите жители говорат неправедност, а и нивниот јазик е измамлив во нивната уста.

Затоа ќе почнам да те поразувам со запустување поради твоите гревови.

Ќе јадеш - и нема да се наситуваш; празнина ќе има внатре во тебе; ќе собираш, но нема да зачуваш, а она што ќе зачуваш, тоа Јас ќе го предадам на меч.

Ќе сееш, но нема да жнееш; ќе гмечиш маслинки, но нема да се намажеш со масло; ќе цедиш гроздов сок, но нема да пиеш вино.

Вие ги пазите обичаите на Амри и сите дела на Ахавовиот дом, и вие постапувате според нивните совети. Затоа ќе те предадам на запустување и твоите жители на потсмев, а вие ќе претрпите поруга од Мојот народ.