Филимон

Павле, затвореник на Христос Исус, и братот Тимотеј, до нашиот сакан соработник Филимон,

до сестрата Апфија, до Архип, нашиот соборец, и до црквата што се собира во твојот дом:

благодат и мир да имате од Бог, нашиот Татко и од Господ Исус Христос.

Секогаш Му благодарам на мојот Бог кога те спомнувам во своите молитви,

зашто слушам за твојата вера во Господ Исус и за твојата љубов кон сите свети.

Се молам твоето заедништво во верата да стане делотворно преку познавањето на секое добро што е во нас за Христос.

Зашто имав голема радост и утеха поради твојата љубов, брате, бидејќи преку тебе се освежија срцата на светите.

Затоа, иако во Христос имам голема слобода да ти заповедам што треба да направиш,

сепак, поради љубовта, повеќе сакам да те молам – јас, Павле, веќе стар човек, а сега и затвореник на Христос Исус.

Те молам за моето дете Онисим, кого го родив во своите окови.

Некогаш ти беше некорисен, а сега е корисен и за тебе и за мене.

Го испраќам назад кај тебе – него, кој е како моето срце.

Сакав да го задржам кај себе за да ми служи наместо тебе додека сум во окови за Евангелието,

но без твојата согласност не сакав да направам ништо, за твоето добро дело да не биде по принуда, туку доброволно.

Можеби токму затоа за кратко време беше одвоен од тебе, за да го примиш засекогаш,

не веќе како роб, туку повеќе од роб – како сакан брат, особено за мене, а колку повеќе за тебе, и по тело и во Господ.

Затоа, ако ме сметаш за свој соработник, прими го како мене.

Ако ти направил некаква неправда или ти должи нешто, стави го тоа на моја сметка.

Јас, Павле, го пишувам ова своерачно: јас ќе платам – да не ти спомнам дека и самиот си ми должен.

Да, брате, дозволи ми да имам корист од тебе во Господ; освежи го моето срце во Христос.

Уверен во твојата послушност, ти го напишав ова, знаејќи дека ќе направиш и повеќе од она што го барам.

А воедно подготви ми и сместување, зашто се надевам дека преку вашите молитви ќе ви бидам повторно вратен.

Те поздравува Епафрас, затвореникот што е заедно со мене во Христос Исус,

како и Марко, Аристарх, Димас и Лука, моите соработници.

Благодатта на нашиот Господ Исус Христос нека биде со вашиот дух.