Тит

Потсетувај ги да им се покоруваат на владетелите и властите, да бидат послушни и подготвени за секое добро дело,

да не зборуваат зло за никого, да не бидат кавгаџии, туку благи и да покажуваат целосна кротост кон сите луѓе.

Зашто и ние некогаш бевме неразумни, непокорни и заблудени, робувајќи им на разни желби и задоволства, живеејќи во злоба и завист, омразени и мразејќи се едни со други.

Но кога се јавија добрината на Бог, нашиот Спасител, и Неговата љубов кон луѓето,

Тој нѐ спаси, не поради праведните дела што ги направивме, туку според Својата милост, преку измивањето на повторното раѓање и обновувањето од Светиот Дух,

Кого богато Го излеа врз нас преку Исус Христос, нашиот Спасител,

за, оправдани преку Неговата благодат, да станеме наследници според надежта за вечен живот.

Веродостоен е овој збор. Сакам цврсто да го нагласуваш ова, за оние што поверувале во Бог ревносно да вршат добри дела. Тоа е добро и корисно за луѓето.

А избегнувај глупави расправии, списоци на предци, караници и препирки околу Законот, зашто се бескорисни и безвредни.

Човек што предизвикува поделби, по првата и втората опомена, отфрли го,

знаејќи дека таквиот е изопачен и греши, самиот осудувајќи се.

Кога ќе ги испратам кај тебе Артема или Тихик, побрзај да дојдеш кај мене во Никопол, зашто решив таму да презимувам.

Погрижи се Зина, познавачот на Законот, и Аполос внимателно да ги испратиш на пат, за ништо да не им недостига.

И нашите нека научат да се посветуваат на добри дела за итните потреби, за да не бидат бесплодни.

Те поздравуваат сите што се со мене. Поздрави ги оние што нѐ љубат во верата. Благодатта нека биде со сите вас.