Изреки

И ова се изреки на Соломон, кои ги препишале луѓето на Езекија, царот на Јуда.

Божја слава е да сокрие нешто, а слава на царевите е да го истражат.

Како што небесата се недостижни по височина и земјата по длабочина, така не може целосно да се истражи ни срцето на царевите.

Отстрани ја згурата од среброто и златарот ќе добие чист материјал за сад.

Отстрани го безбожниот од царското присуство и престолот ќе се зацврсти со праведност.

Не возвишувај се пред царот и не застанувај на местото на големите,

зашто подобро е да ти речат: „Дојди повисоко“, отколку да те понижат пред владетел кого твоите очи веќе го виделе.

Не брзај да започнеш спор, зашто што ќе правиш на крајот ако твојот ближен те посрами?

Расправи го својот случај со својот ближен, но не откривај туѓа тајна,

за да не те посрами оној што ќе го чуе тоа и твојот лош глас да не остане.

Збор кажан во вистинско време е како златни јаболка во сребрена изработка.

Како златна обетка и украс од чисто злато е мудриот укор за увото што сака да слуша.

Како свежината од снег среде жетва е верниот гласник за оние што го испратиле; тој им ја освежува душата.

Како облаци и ветер без дожд е човек што се фали со дар што никогаш не го дал.

Со трпение може да се придобие и владетел, а благиот јазик може да скрши и коска.

Ако најдеш мед, јади колку што ти е доволно, за да не се прејадеш и да го повратиш.

Не оди премногу често во домот на својот ближен, за да не му здодееш и да те замрази.

Како боздоган, меч и остра стрела е човек што лажно сведочи против својот ближен.

Да се надеваш на неверен човек во време на неволја е како да се потпираш на скршен заб или повредена нога.

Како да му ја соблечеш облеката на човек во студен ден, или да истуриш оцет врз сода, така е да му пееш весели песни на нажалено срце.

Ако твојот непријател е гладен, дај му леб да јаде; ако е жеден, дај му вода да пие.

Така ќе натрупаш жар врз неговата глава, а Господ ќе ти возврати.

Како што северниот ветер донесува дожд, така клеветничкиот јазик предизвикува гневен поглед.

Подобро е да живееш во агол на покривот отколку во голема куќа со кавгаџиска жена.

Како студена вода за изморена душа е добра вест од далечна земја.

Како заматен извор и загадена чешма е праведниот што попушта пред безбожниот.

Не е добро да се јаде премногу мед, ниту е чест човек да ја бара сопствената слава.

Како разурнат град без ѕидови е човек што не знае да владее со својот дух.