Псалми

Ќе пеам за милоста и правдата; Тебе, Господи, ќе Ти упатувам пофалба.

Ќе внимавам да одам по патот на непорочноста. Кога ќе дојдеш кај мене? Во својот дом ќе живеам со чисто срце.

Нема да ставам пред своите очи ништо што е подло. Ги мразам делата на неверните и нема да дозволам да се прилепат до мене.

Изопаченото срце ќе го држам далеку од себе; со злото нема да имам ништо.

Ќе го отстранам оној што тајно го клевети својот ближен; нема да го трпам оној што гледа горделиво и носи надмено срце.

Моите очи ќе бидат насочени кон верните во земјата, за тие да живеат со мене; ќе ми служи оној што оди по непорочен пат.

Кој постапува измамливо нема да остане во мојот дом, а оној што зборува лага нема да опстои пред моите очи.

Секое утро ќе ги отстранувам безбожниците од земјата, за од Господовиот град да ги истребам сите што вршат беззаконие.