Псалми

Благодарете Му на Господ и повикувајте го Неговото име; меѓу народите разгласувајте ги Неговите дела.

Пејте Му, упатувајте Му пофалба и раскажувајте за сите Негови чудесни дела.

Гордејте се со Неговото свето име; нека се радуваат срцата на оние што Го бараат Господ.

Барајте Го Господ и Неговата сила; постојано барајте го Неговото лице.

Сеќавајте се на чудесните дела што ги направи, на Неговите знаци и на судовите што ги изговори,

вие, потомци на Авраам, Неговиот слуга, и Јаковови синови, Негови избраници.

Тој е Господ, нашиот Бог, и Неговите судови важат по целата земја.

Тој довека се сеќава на Својот завет, на зборот што го даде за илјада поколенија,

се сеќава на заветот што го склучи со Авраам и на заклетвата што му ја даде на Исак.

Потоа тоа му го потврди на Јаков како одредба, а на Израел како вечен завет,

кога рече: „Тебе ќе ти ја дадам хананската земја и таа ќе биде дел од вашето наследство.“

Во тоа време тие беа малубројни, сосема малкумина, и беа туѓинци во таа земја.

Се селеа од народ до народ, од едно царство кај друг народ.

Но Тој не дозволи никој да ги угнетува и поради нив укоруваше цареви:

„Не допирајте ги Моите помазаници и не нанесувајте им зло на Моите пророци!“

Потоа повика глад врз земјата и го прекина секој извор на храна.

Но пред нив испрати еден човек – Јосиф, кој беше продаден како роб.

Нозете му ги стегнаа со окови, а околу вратот му ставија железен синџир,

сѐ додека не дојде времето да се исполни она што го беше кажал и Господовиот збор не ја потврди неговата верност.

Тогаш царот заповеда да го ослободат; владетелот на народите го пушти на слобода.

Го постави за господар над својот дом и за управител над сиот свој имот,

за да ги поучува владетелите според својата волја и на мудрост да ги учи неговите старешини.

Потоа Израел дојде во Египет, а Јаков се насели во Хамовата земја.

Господ силно го намножи Својот народ и го направи помоќен од неговите противници.

Тој им го промени срцето на Египќаните, па тие го замразија Неговиот народ и почнаа лукаво да постапуваат со Неговите слуги.

Тогаш го испрати Мојсеј, Својот слуга, и Арон, кого го беше избрал.

Преку нив ги направи Своите знаци и чудеса во Хамовата земја.

Испрати темнина и настана густ мрак; тие не им се спротивставија на Неговите зборови.

Водите им ги претвори во крв и ги погуби нивните риби.

Нивната земја се наполни со жаби, дури и во одаите на нивните цареви.

Тој рече, и дојдоа роеви муви и мушички по сите нивни краишта.

Наместо дожд им испрати град, а пламен оган ја зафати нивната земја.

Им ги уништи лозјата и смоквите и ги искрши дрвјата по нивните краишта.

Тој рече, и дојдоа скакулци и безброј гасеници.

Тие ја изедоа сета растителност во нивната земја и сиот плод на нивните ниви.

Потоа ги погуби сите првородени во нивната земја, првината на сета нивна сила.

А Својот народ го изведе со сребро и злато, и меѓу Неговите племиња немаше изнемоштен.

Египет се радуваше кога тие заминаа, зашто стравот од нив го беше обзел.

Господ распна облак како покрив над нив, а ноќе им даде оган да им свети.

Тие побараа храна, и Тој им донесе потполошки и ги насити со небесен леб.

Ја расцепи карпата и бликна вода, која потече низ сувата земја како река.

Зашто се сети на Своето свето ветување дадено на Авраам, Својот слуга.

Така го изведе Својот народ со радост, а Своите избраници со радосни песни.

Им ги даде земјите на другите народи, и тие го наследија плодот од нивниот труд,

за да ги пазат Неговите заповеди и да живеат според Неговите закони. Алилуја!