Псалми

Ќе Го славам Господ од сето срце, заедно со праведните во нивниот совет и во собранието.

Големи се Господовите дела, и сите што уживаат во нив со радост ги истражуваат.

Славно и величествено е она што Тој го прави, а Неговата праведност трае довека.

Тој направи Неговите чудесни дела да не се заборават; благ и милостив е Господ.

Им дава храна на оние што имаат страв од Него и никогаш не го заборава Својот завет.

На Својот народ му ја покажа силата на Своите дела, кога му го даде наследството на другите народи.

Делата на Неговите раце се верни и праведни, а сите Негови заповеди се сигурни.

Тие се утврдени засекогаш и довека и се исполнуваат во верност и праведност.

Тој му донесе откупување на Својот народ и го утврди Својот завет довека; свето и достојно за почит е Неговото име.

Стравот од Господ е почеток на мудроста; добар разум имаат сите што живеат според него. Неговата пофалба трае довека.