Псалми

Господи, сети се на Давид и на сите тешкотии низ кои помина,

сети се како Му се заколна на Господ и Му даде завет на Јакововиот Силен:

„Нема да влезам во својот дом, ниту ќе легнам на својата постела.

Нема да им дозволам сон на своите очи, ниту дремка на своите клепки,

сѐ додека не најдам место за Господ, живеалиште за Јакововиот Силен.“

Ете, слушнавме за ковчегот во Ефрата, а потоа го најдовме во полињата на Јаар.

Да влеземе во Неговото живеалиште и таму да се поклониме пред подножјето на Неговите нозе.

Стани, Господи, и влези во Своето почивалиште, Ти и ковчегот на Твојата сила.

Твоите свештеници нека бидат облечени во праведност, а оние што Ти припаѓаат нека воскликнуваат од радост.

Заради Давид, Твојот слуга, не го отфрлај Својот помазаник.

Господ му даде на Давид вистинита заклетва од која нема да се откаже: „Еден од твоите потомци ќе поставам на твојот престол.

Ако твоите синови го пазат Мојот завет и сведоштвата на кои ќе ги научам, тогаш и нивните синови ќе седат на твојот престол довека.“

Зашто Господ го избра Сион и посака токму таму да живее.

„Ова е Моето почивалиште довека; тука ќе живеам, зашто тоа го посакав.

Изобилно ќе ја благословам неговата храна, а сиромашните во него ќе ги наситам со леб.

Неговите свештеници ќе ги облечам со спасение, а оние што Ми припаѓаат ќе воскликнуваат од радост.

Таму ќе направам да израсне Давидовата сила и ќе подготвам светилка за Својот помазаник.

Неговите непријатели ќе ги покријам со срам, а круната врз неговата глава ќе блеска.“