Псалми

Покрај реките во Вавилон седевме и плачевме кога ќе се сетевме на Сион.

На врбите што растеа таму ги закачивме своите харфи.

Зашто оние што нѐ заробија бараа да им пееме, а оние што нѐ опустошија бараа да ги развеселуваме: „Испејте ни некоја од Сионските песни!“

Но како да ја пееме Господовата песна додека сме во туѓа земја?

Ако некогаш те заборавам, Ерусалиме, нека ја заборави мојата десна рака својата вештина.

Нека ми се залепи јазикот за непцето ако престанам да се сеќавам на тебе, ако Ерусалим не го ставам над секоја своја радост.

Господи, сети се што правеа Едомците во денот кога Ерусалим беше разоруван, како викаа: „Разурнете го! Разурнете го до самите темели!“

Ќерко вавилонска, тебе те чека опустошување; блажен е оној што ќе ти возврати за она што ти ни го направи.

Блажен ќе биде оној што ќе ги фати твоите деца и ќе ги разбие од карпа.