Псалми

Безумниот си вели во срцето: „Нема Бог.“ Луѓето се расипаа и прават одвратни дела; нема кој да прави добро.

Господ погледна од небото кон луѓето, за да види има ли некој разумен, некој што Го бара Бог.

Сите застранија и сите заедно се расипаа; нема кој да прави добро, нема ниту еден.

Зар навистина немаат разум сите што прават зло, оние што го голтаат Мојот народ како леб, а Господ не Го повикуваат?

Таму ќе ги обземе голем страв, зашто Бог е со поколението на праведните.

Можете да ја исмевате надежта на сиромашниот, но неговото вистинско прибежиште е Господ.

О, нека дојде од Сион спасението за Израел! Кога Господ ќе го врати Својот народ од ропство, Јаков ќе се радува, а Израел ќе се весели.