Псалми

Пејте Му на Господ нова песна; Неговата пофалба нека се слуша во собранието на оние што Му припаѓаат.

Израел нека се радува во својот Создател, а синовите на Сион нека се веселат во својот Цар.

Нека го слават Неговото име со оро и нека Му пеат пофалби со тапанче и харфа.

Зашто Господ се радува на Својот народ, а кротките ги украсува со победа.

Оние што Му припаѓаат нека се радуваат во славата и нека воскликнуваат од радост дури и на своите легла.

Нека имаат Божја пофалба во устата, а меч со две острици во раката,

за над народите да извршат одмазда, а над племињата заслужена казна,

за нивните цареви да ги врзат со синџири, а нивните благородници со железни окови,

и над нив да го извршат судот што е запишан. Оваа чест им припаѓа на сите што Му припаѓаат. Алилуја!