Псалми

Зошто народите беснеат и племињата смислуваат залудни работи?

Земните цареви се креваат, а владетелите се здружуваат против Господ и против Неговиот Помазаник:

„Да ги раскинеме нивните окови и да ги отфрлиме нивните јажиња од себе!“

Оној што седи на небесата се смее; Господ им се потсмева.

Тогаш во Својот гнев ќе им проговори и со жестоката Своја лутина ќе ги исплаши:

„Јас веќе го поставив Мојот Цар на Сион, на Мојата света гора.“

Ќе ја објавам одлуката што Господ ја донесе. Тој Ми рече: „Ти си Мојот Син; денес Јас Те родив.

Побарај од Мене, и ќе Ти ги дадам народите за наследство, а краиштата на земјата за Твоја сопственост.

Со железен стап ќе ги скршиш и ќе ги распарчиш како грнчарски сад.“

Затоа, цареви, вразумете се; примете поука, вие земни судии.

Служете Му на Господ со стравопочит и радувајте се пред Него со трепет.

Поклонете Му се на Синот, за да не се разгневи и да не загинете на патот, зашто Неговиот гнев брзо се разгорува. Блажени се сите што прибегнуваат кон Него.