Псалми

Кон Тебе повикувам, Господи, моја Карпо; не молчи пред мене, зашто ако останеш нем, ќе бидам како оние што слегуваат во гробот.

Чуј го гласот на моите молби кога Те повикувам и кога ги кревам рацете кон најсветото место на Твоето светилиште.

Не одвлекувај ме заедно со безбожните и со оние што прават зло; тие зборуваат мирно со своите ближни, а во срцето кријат зло.

Возврати им според нивните дела и според злобата на нивните постапки; дај им го она што го заслужиле со делата на своите раце.

Тие не внимаваат на Господовите дела, ниту на она што го направиле Неговите раце; затоа Тој ќе ги урне и нема повторно да ги изгради.

Славен нека биде Господ, зашто го чу гласот на моите молби.

Господ е моја сила и мој штит; во Него се надева моето срце и Тој ми помогна. Затоа срцето ми се радува и со својата песна ќе Го славам.

Господ е силата на Својот народ и спасоносна тврдина за Својот Помазаник.

Спаси го Својот народ и благослови го Своето наследство; биди нивен Пастир и носи ги довека.