Псалми

Чуј ги моите зборови, Господи, и внимавај на моето воздивнување.

Слушни го гласот на мојот повик, Цару мој и Боже мој, зашто Тебе Ти се молам.

Господи, уште наутро ќе го чуеш мојот глас; наутро ќе ја принесам пред Тебе мојата молитва и со надеж ќе очекувам.

Ти не си Бог на Кого Му е мило беззаконието; злото не може да престојува кај Тебе.

Горделивите не можат да опстанат пред Твоите очи; Ти ги мразиш сите што прават зло.

Ги погубуваш оние што зборуваат лага; Господ се гнаси од крвожедниот и измамлив човек.

Но јас, поради Твојата голема милост, ќе влезам во Твојот дом и со стравопочит ќе се поклонам пред Твојот свет храм.

Господи, поради моите непријатели води ме по патот на Твојата праведност; направи го Твојот пат јасен пред мене.

Во нивната уста нема искреност, а срцето им е полно со зло. Нивното грло е како отворен гроб, а со јазикот ласкаат.

Боже, прогласи ги за виновни! Нека пропаднат поради сопствените замисли; отфрли ги поради многуте престапи, зашто се побунија против Тебе.

А сите што се надеваат на Тебе нека се радуваат; нека пеат од радост засекогаш, зашто Ти ги закрилуваш. Нека ликуваат во Тебе сите што го сакаат Твоето име.

Зашто Ти, Господи, го благословуваш праведниот и го опкружуваш со Својата наклонетост како со штит.