Псалми

Господи, Боже мој, во Тебе се засолнувам; спаси ме од сите што ме гонат и избави ме,

за да не ме растргнат како лав и да не ме распарчат кога нема кој да ме избави.

Господи, Боже мој, ако сум го направил тоа, ако има неправда на моите раце,

ако со зло сум му возвратил на оној што живееше во мир со мене, или без причина сум го ограбил мојот непријател,

тогаш нека ме гони непријателот и нека ме стигне; нека го згази мојот живот до земја и нека ја фрли мојата чест во прав.

Стани, Господи, во Својот гнев; крени се против бесот на моите противници. Разбуди се заради мене и изврши го судот што си го определил.

Нека се соберат народите околу Тебе, а Ти застани високо над нив.

Господ им суди на народите. Суди ми, Господи, според мојата праведност и според непорочноста што е во мене.

Нека престане злото на безбожните, а праведниот зацврсти го, праведен Боже, Ти што ги испитуваш срцата и најскриените мисли.

Бог е мојот штит; Тој ги спасува оние што имаат искрено срце.

Бог е праведен Судија, Бог Кој секој ден се гневи на злото.

Ако човекот не се врати од својот пат, Бог ќе го наостри Својот меч; веќе го затегна лакот и го подготви.

За безбожникот Тој подготвува смртоносно оружје и ги прави Своите стрели огнени.

Ете, безбожниот зачнува зло, носи неправда во себе и на крај раѓа лага.

Ископа длабока јама, но на крајот самиот падна во дупката што ја ископа.

Злото што го прави ќе му се врати врз главата, а неговото насилство ќе падне врз неговото теме.

Ќе Го славам Господ за Неговата праведност и ќе Му пеам на Господ Севишниот.