Псалми

Боже, дај му ги Своите праведни судови на царот и Својата праведност на царскиот син,

за праведно да му суди на Твојот народ и со правда да ги брани угнетените.

Планините нека му донесат мир на народот, а ридовите нека донесат праведност.

Нека им донесе правда на угнетените од народот, нека ги спаси децата на сиромашните и нека го скрши насилникот.

Нека имаат страв од Тебе сѐ додека трае сонцето и додека постои месечината, од поколение до поколение.

Тој ќе дојде како дожд врз окосена ливада, како ситен дожд што ја напојува земјата.

Во неговите денови праведниот ќе цвета и ќе има изобилен мир сѐ додека постои месечината.

Неговото владеење ќе се протега од море до море и од Еуфрат до краиштата на земјата.

Пред него ќе клекнат пустинските жители, а неговите непријатели ќе ја лижат правта.

Царевите на Таршиш и островите ќе донесуваат подароци; царевите на Сева и Шева ќе принесуваат дарови.

Сите цареви ќе му се поклонат, и сите народи ќе му служат.

Зашто тој ќе го избави сиромашниот кога повикува и угнетениот што нема никој да му помогне.

Ќе се смилува на сиромашниот и бедниот и ќе ги спаси животите на немоќните.

Од угнетување и насилство ќе им го откупи животот, а нивната крв ќе биде скапоцена во неговите очи.

Нека живее! Нека му дадат од златото на Шева; постојано нека се молат за него и цел ден нека му посакуваат благослов.

Нека има изобилство жито по земјата, дури и по врвовите на планините; неговиот плод нека се ниша како ливанските дрвја, а жителите на градовите нека цветаат како тревата на земјата.

Неговото име нека трае довека и нека се продолжува додека свети сонцето. Преку него луѓето ќе примаат благослов и сите народи ќе го нарекуваат блажен.

Славен нека биде Господ, Израелевиот Бог, Кој единствен прави чудеса!

Славно нека биде Неговото величествено име довека! Нека се исполни целата земја со Неговата слава! Амин и амин!

Со ова завршуваат молитвите на Давид, Јесеевиот син.