Псалми

Навистина, Бог е добар кон Израел, кон сите што имаат чисто срце.

А моите нозе речиси се сопнаа; за малку ќе ми се лизнеа чекорите.

Зашто им завидував на горделивите кога гледав колку добро им оди на безбожниците.

Изгледа дека немаат маки ни кога умираат, а телото им е здраво и силно.

Не ги допираат вообичаените човечки неволји и не страдаат како другите луѓе.

Затоа гордоста им виси како ѓердан околу вратот, а насилството го носат како облека.

Очите им се испакнати од изобилство; имаат повеќе отколку што срцето им посакува.

Се потсмеваат и злобно зборуваат; со горделивост се закануваат со насилство.

Устата ја креваат кон небото, а јазикот им се шири по целата земја.

Затоа и народот се врти кон нив и ги впива нивните зборови како вода од полна чаша.

Тие велат: „Како би знаел Бог? Зар Севишниот воопшто знае?“

Ете, такви се безбожниците: живеат спокојно и постојано го зголемуваат богатството.

Тогаш се прашав: зар напразно го очистив срцето и ги измив рацете во невиност?

Зашто цел ден сум измачуван и секое утро ме снаоѓа нова казна.

Но ако речев: „И јас ќе зборувам така“, ќе го изневерев поколението на Твоите деца.

Се обидував да разберам што значи сето тоа, но ми беше претешко,

сѐ додека не влегов во Божјото светилиште и не го согледав нивниот крај.

Навистина, Ти ги поставуваш на лизгави места и ги оставаш да паднат во пропаст.

Колку ненадејно пропаѓаат! За миг исчезнуваат, совладани од ужас.

Како сон што исчезнува по будењето, така и Ти, Господи, кога ќе станеш, ќе го отфрлиш нивниот лик.

Кога срцето ми беше огорчено и длабоко во себе чувствував болка,

бев неразумен и ништо не разбирав; пред Тебе бев како бесловесно животно.

Но јас и понатаму сум со Тебе; Ти ме држиш за десната рака.

Ти ќе ме водиш со Својот совет, а потоа ќе ме примиш во слава.

Кого имам на небото освен Тебе? А и на земјата никој не го посакувам повеќе од Тебе.

И телото и срцето можат да ми ослабнат, но Бог останува силата на моето срце и мојот вечен дел.

Оние што се оддалечуваат од Тебе сигурно ќе загинат; Ти ги уништуваш сите што неверно Те напуштаат.

А за мене најголемо добро е да бидам близу до Бог. Господ Бог го направив свое прибежиште, за да ги објавувам сите Твои дела.