Псалми

Те славиме, Боже, Те славиме! Твоето име е близу, и луѓето раскажуваат за Твоите чудесни дела.

„Кога ќе дојде времето што сум го определил, ќе судам праведно.

Иако земјата и сите нејзини жители се разнишуваат, Јас цврсто ги држам нејзините столбови.“

На горделивите им реков: „Не гордејте се!“ А на безбожниците: „Не кревајте го својот рог!

Не кревајте го рогот високо и не зборувајте со вкочанет врат!“

Зашто возвишувањето не доаѓа ни од исток, ни од запад, ни од пустината;

Бог е Судијата: едниот го понижува, а другиот го возвишува.

Во Господовата рака има чаша полна со пенливо, зачинето вино. Тој налива од неа, а сите земни безбожници ќе ја испијат до дното, заедно со талогот.

А јас ќе го разгласувам тоа довека и ќе Му пеам пофалба на Јакововиот Бог.

„Ќе ја скршам силата на сите безбожници, а силата на праведните ќе биде возвишена.“