Псалми

Во Јуда Бог е добро познат, а во Израел Неговото име е големо.

Неговиот шатор е во Шалем, а Неговото живеалиште на Сион.

Таму Тој ги искрши огнените стрели, лакот, штитот, мечот и сето оружје на војната.

Ти блескаш во слава и си повеличествен од планините натрупани со плен.

Храбрите по срце беа ограбени и заспаа; ниеден од силните воини не можеше ни да ја крене раката.

Од Твојата закана, Јаковов Боже, и коњите и бојните коли паднаа во длабок сон.

Само Ти си достоен за стравопочит! Кој може да стои пред Тебе кога ќе се разгневиш?

Од небесата ја објави Својата пресуда, и целата земја се исплаши и замолкна,

во мигот кога Бог стана да суди и да ги спаси сите кротки на земјата.

Дури и човечкиот гнев ќе се претвори во пофалба за Тебе, а остатокот од гневот Ти ќе го запреш.

Заветувајте Му се на Господ, вашиот Бог, и исполнете ги своите завети; сите што се околу Него нека Му донесат дарови на Оној што е достоен за стравопочит.

Тој ја крши гордоста на владетелите; страшен е за земните цареви.