Псалми

Боже, немој да молчиш; не останувај безгласен и нем!

Ете, Твоите непријатели креваат врева, а оние што Те мразат горделиво ја креваат главата.

Смислуваат лукави планови против Твојот народ и се договараат против оние што Ти ги заштитуваш.

Велат: „Дојдете, да ги истребиме за повеќе да не бидат народ и името на Израел никогаш веќе да не се спомнува!“

Еднодушно се договорија и склучија сојуз против Тебе:

Едом и Исмаелците, Моав заедно со Хагријците,

Гевал, Амон и Амалек, Филистеја заедно со жителите на Тир.

И Асирија им се придружи; станаа силна потпора на Лотовите синови.

Постапи со нив како со Мидјанците, како со Сисра и Јавин кај потокот Кишон,

кои загинаа кај Ејн-Дор и станаа како ѓубриво за земјата.

Нивните благородници направи ги како Орев и Зеев, а сите нивни владетели како Зевах и Цалмуна,

оние што рекоа: „Да ги присвоиме за себе Божјите живеалишта!“

Боже мој, направи ги како прав што се врти во виор, како плева што ветерот ја разнесува.

Како што огнот ја проголтува шумата и пламенот ги запалува планините,

така и нив гони ги со Својата бура и преплаши ги со Својот виор.

Покриј им ги лицата со срам, за конечно да го побараат Твоето име, Господи.

Нека се посрамат и ужаснат засекогаш; нека бидат збунети и нека загинат,

за сите да знаат дека само Ти, Чие име е Господ, си Севишен над целата земја.