Псалми

Господи, Ти покажа наклонетост кон Својата земја и го врати Јаков од ропство.

Го прости беззаконието на Својот народ и го покри целиот негов грев.

Го повлече Својот гнев и се одврати од жестоката Своја лутина.

Врати нѐ кај Себе, Боже на нашето спасение, и прекини да се гневиш на нас.

Зар ќе ни се гневиш засекогаш? Зар Твојот гнев ќе продолжува од поколение во поколение?

Зар нема повторно да ни дадеш живот, за Твојот народ да може да се радува во Тебе?

Покажи ни ја Својата милост, Господи, и подари ни го Своето спасение.

Ќе слушам што ќе каже Господ Бог, зашто Тој ќе му зборува за мир на Својот народ и на Своите свети; само тие да не се вратат повторно на безумството.

Навистина, Неговото спасение е близу до оние што имаат страв од Него, за Неговата слава да живее во нашата земја.

Милоста и верноста се сретнаа; праведноста и мирот се прегрнаа.

Верноста никнува од земјата, а праведноста погледнува од небото.

Господ ќе ни го даде она што е добро, а нашата земја ќе го даде својот плод.

Праведноста ќе оди пред Него и ќе го подготвува патот по кој Тој чекори.