Псалми

Оној што живее под закрилата на Севишниот ќе почива под сенката на Семоќниот.

За Господ ќе речам: „Тој е моето прибежиште и мојата тврдина, мојот Бог, во Кого се надевам.“

Тој ќе те избави и од стапицата на ловецот и од смртоносната зараза.

Ќе те покрие со Своите пердуви, а под Неговите крилја ќе најдеш засолниште; Неговата верност ќе ти биде штит и заштита.

Нема да се плашиш од ужасите на ноќта, ниту од стрелата што лета дење,

ниту од заразата што се движи во темнината, ниту од погибелта што опустошува напладне.

Илјада ќе паднат покрај тебе, а десет илјади од твојата десна страна, но до тебе нема да се приближи.

Само ќе гледаш со свои очи и ќе ја видиш казната на безбожниците.

Зашто ти го избра Господ за свое прибежиште и Севишниот за свое живеалиште.

Затоа никакво зло нема да те снајде и никаква неволја нема да се приближи до твојот шатор.

Тој ќе им заповеда на Своите ангели да те чуваат каде и да одиш.

Тие ќе те носат на раце, за да не ја удриш ногата од камен.

Ќе стапнеш врз лав и змија; ќе згазиш и млад лав и отровница.

„Бидејќи со љубов се приврза кон Мене, ќе го избавам; ќе го поставам на сигурно место, зашто го позна Моето име.

Ќе Ме повика, и Јас ќе му одговорам; ќе бидам со него во неволја, ќе го избавам и ќе му дадам чест.

Ќе го наситам со долг живот и ќе му дозволам да го види Моето спасение.“