Псалми

Господ царува! Нека се радува земјата и нека се веселат многубројните острови.

Облаци и темнина се околу Него; праведноста и правдата се темел на Неговиот престол.

Оган оди пред Него и ги проголтува Неговите противници од сите страни.

Неговите молњи го осветлуваат светот; земјата го гледа тоа и трепери.

Пред Господ планините се топат како восок, пред Господарот на целата земја.

Небесата ја разгласуваат Неговата праведност, а сите народи ја гледаат Неговата слава.

Нека се посрамат сите што им служат на изрезбани ликови и се фалат со своите идоли. Поклонете Му се, сите богови!

Сион го слушна тоа и се израдува, а Јудините ќерки се развеселија поради Твоите судови, Господи.

Зашто Ти, Господи, си Севишен над целата земја и си возвишен далеку над сите богови.

Вие што Го сакате Господ, мразете го злото! Тој ги пази животите на Своите свети и ги избавува од рацете на безбожниците.

Светлина изгрева за праведниот, а радост за оние со искрено срце.

Радувајте се во Господ, праведници, и благодарете Му кога се сеќавате на Неговата светост.