Откровение

Глава 6

1
Потоа видов како Агнецот отвори еден од седумте печати и слушнав едно од четирите живи суштества како со глас сличен на гром вели: „Дојди!“
2
Погледнав, и ете — бел коњ. Оној што седеше на него имаше лак. Му беше даден венец и тој излезе како победник, за да победува.
3
Кога Агнецот го отвори вториот печат, го слушнав второто живо суштество како вели: „Дојди!“
4
И излезе друг коњ, огненоцрвен. На оној што седеше на него му беше дадено да го одземе мирот од земјата, за луѓето да се убиваат еден со друг. Му беше даден и голем меч.
5
Кога го отвори третиот печат, го слушнав третото живо суштество како вели: „Дојди!“ Погледнав, и ете — црн коњ. Оној што седеше на него држеше вага во својата рака.
6
И слушнав нешто како глас среде четирите живи суштества, кој велеше: „Мерка пченица за еден денариј и три мерки јачмен за еден денариј; а маслото и виното не ги оштетувај.“
7
Кога го отвори четвртиот печат, го слушнав гласот на четвртото живо суштество како вели: „Дојди!“
8
Погледнав, и ете — бледозелен коњ. Оној што седеше на него се викаше Смрт, а адот одеше по него. Им беше дадена власт над четвртина од земјата, да убиваат со меч, глад, смрт и со земните ѕверови.
9
Кога го отвори петтиот печат, ги видов под жртвеникот душите на оние што беа убиени поради Божјиот збор и поради сведоштвото што го имаа.
10
Тие викаа со силен глас: „До кога, свет и вистинит Господару, ќе чекаш да судиш и да ја одмаздиш нашата крв врз жителите на земјата?“
11
На секого од нив му беше дадена бела облека и им беше речено да почиваат уште малку, додека не се исполнат и нивните сослужители и браќа што требаше да бидат убиени како и тие.
12
Потоа видов како го отвори шестиот печат. Настана силен земјотрес; сонцето стана црно како вреќиште од козина, а целата месечина стана како крв.
13
Небесните ѕвезди паѓаа на земјата како што смоква, потресена од силен ветер, ги фрла своите недозреани плодови.
14
Небото се повлече како свиток што се завиткува, а секоја гора и секој остров беа поместени од своите места.
15
Земните цареви, големците, војсководците, богатите, силните, како и секој роб и слободен човек, се сокрија во пештерите и меѓу карпите на горите.
16
Им велеа на горите и карпите: „Паднете врз нас и скријте нѐ од лицето на Оној Кој седи на престолот и од гневот на Агнецот!
17
Зашто дојде големиот ден на нивниот гнев — и кој може да опстане?“