Римјаните

Павле, слуга на Исус Христос, повикан да биде апостол и одвоен за Божјото Евангелие,

кое Бог однапред го вети преку Своите пророци во Светите писма,

за Својот Син, Кој по тело потекнува од потомството на Давид,

а според Духот на светоста беше објавен за Божји Син во сила преку воскресението од мртвите – Исус Христос, нашиот Господ.

Преку Него примивме благодат и апостолство, за да ги повикаме сите народи на послушност што произлегува од верата, заради Неговото име.

Меѓу нив сте и вие, повикани да Му припаѓате на Исус Христос.

До сите во Рим, сакани од Бог и повикани да бидат свети: благодат и мир од Бог, нашиот Татко и од Господ Исус Христос.

Најнапред, преку Исус Христос Му благодарам на мојот Бог за сите вас, зашто за вашата вера се зборува по целиот свет.

Бог, Кому Му служам со својот дух, проповедајќи го Евангелието за Неговиот Син, ми е сведок дека постојано ве спомнувам

во своите молитви, молејќи се најпосле, по Божја волја, да ми се отвори пат да дојдам кај вас.

Копнеам да ве видам, за да ви предадам некој духовен дар и така да ве зацврстам,

односно, додека сум меѓу вас, заемно да се охрабриме преку верата што ја имаме и вие и јас.

Сакам да знаете, браќа, дека многупати имав намера да дојдам кај вас, но досега бев спречен, за да имам плод и меѓу вас, како и меѓу другите народи.

Должник сум и на Елините и на варварите, и на мудрите и на неуките.

Затоа, колку што зависи од мене, подготвен сум да ви го проповедам Евангелието и вам во Рим.

Не се срамам од Евангелието, зашто тоа е Божја сила за спасение на секој што верува – најнапред на Јудеецот, а потоа и на Елинот.

Зашто во него се открива Божјата праведност, од вера во вера, како што е напишано: „Праведникот ќе живее преку вера.“

Божјиот гнев се открива од небото против секоја безбожност и неправедност на луѓето што со неправедност ја потиснуваат вистината.

Она што може да се знае за Бог им е јасно, зашто Бог им го откри.

Неговите невидливи својства – Неговата вечна сила и божественост – јасно се согледуваат уште од создавањето на светот преку она што е создадено, така што тие немаат изговор.

Иако Го познаа Бог, не Го прославија како Бог, ниту Му заблагодарија, туку станаа празни во своите размислувања, а нивното неразумно срце се помрачи.

Тврдејќи дека се мудри, станаа безумни

и славата на нераспадливиот Бог ја заменија со ликови што личат на распадлив човек, на птици, четириножни животни и лазачи.

Затоа Бог ги предаде на нечистота, според желбите на нивните срца, за да ги обесчестуваат своите тела меѓу себе.

Тие ја заменија Божјата вистина со лага и му се поклонија и му служеа на создаденото наместо на Создателот, Кој е благословен засекогаш. Амин!

Поради тоа Бог ги предаде на срамни страсти: нивните жени го заменија природниот однос со противприроден,

а исто така и мажите го оставија природниот однос со жената и се распалија со страст еден кон друг. Мажи со мажи вршеа срамни дела и врз себе ја примаа заслужената последица на својата заблуда.

Бидејќи не сметаа дека вреди да Го познаваат Бог, Бог ги предаде на изопачен ум, да го прават она што не прилега.

Тие се исполнија со секаква неправедност, злоба, алчност и расипаност; полни со завист, убиства, расправии, измама и злонамерност;

оговарачи, клеветници, мразители на Бог, дрски, горделиви, фалбаџии, измислувачи на зло, непослушни кон родителите,

неразумни, неверни, без љубов и без милост.

Иако ја знаат Божјата праведна одредба дека оние што прават такви работи заслужуваат смрт, тие не само што ги прават, туку и ги одобруваат оние што ги прават.